لاہور: وزیراعلیٰ پنجاب مریم نواز شریف نے پاکستانی سینما اور ثقافتی شناخت کو عالمی نقشے پر دوبارہ روشن کرنے کے لیے ایک تاریخی شاہکار منصوبے کا سنگِ بنیاد رکھ دیا ہے۔ لاہور میں "نواز شریف آئی ٹی سٹی” کے اندر 50 ایکڑ اراضی پر محیط پنجاب فلم سٹی کے قیام کا اعلان کر دیا گیا ہے، جو ملک کا پہلا مکمل "اینڈ ٹو اینڈ” میڈیا پروڈکشن ہب ہوگا۔
وزیراعلیٰ مریم نواز، جو اس وقت پاکستانی فن اور ثقافت کی سب سے بڑی سرپرست کے طور پر ابھری ہیں، کا کہنا ہے کہ اس منصوبے کا مقصد پاکستان کی فلمی صنعت کی جدید ٹیکنالوجی، سہولیات اور وسائل کے ذریعے بحالی یقینی بنانا ہے۔ انہوں نے عزم ظاہر کیا کہ اب فلم، ٹی وی، اینیمیشن اور ڈیجیٹل میڈیا کے لیے تمام جدید سہولیات ایک ہی چھت تلے فراہم کی جائیں گی، جس سے فنکاروں کو اپنی تخلیقی صلاحیتیں دکھانے کا عالمی معیار کا پلیٹ فارم ملے گا۔
فلم سٹی کی سب سے بڑی خاصیت اس کی جدید ترین پوسٹ پروڈکشن لیبز اور VFX اسٹوڈیوز ہیں۔ وزیراعلیٰ کے مطابق، اب پاکستانی فلم سازوں کو ایڈیٹنگ اور اسپیشل ایفیکٹس کے لیے لاکھوں ڈالر خرچ کر کے بیرونِ ملک نہیں جانا پڑے گا۔ اسٹوڈیوز، ساؤنڈ اسٹیج اور شوٹنگ کے لیے بنائی جانے والی مرکزی جھیل اور مختلف سیٹس پاکستان کو بین الاقوامی شوٹنگ ڈیسٹینیشن بنا دیں گے۔
Big announcement: Punjab to establish a 50 acre , first of its kind #PunjabFilmCity in Lahore bringing the glory of filmmaking back to Lahore and Punjab.
Conceived nearly two years ago and shaped through continuous consultations with filmmakers, producers, and actors, this… pic.twitter.com/E9mwLb0lJh
— Maryam Nawaz Sharif (@MaryamNSharif) April 26, 2026
منصوبے کی تفصیلات بتاتے ہوئے وزیراعلیٰ مریم نواز شریف نے انکشاف کیا کہ:
کنونشن ہالز: بین الاقوامی فلم ایوارڈز اور بڑے ایونٹس کے لیے اسٹیٹ آف دی آرٹ ہالز تعمیر کیے جائیں گے۔
فلم و میوزک اسکول: نئے ٹیلنٹ کی آبیاری کے لیے پیشہ ورانہ تربیت گاہیں بنائی جائیں گی۔
میڈیا ٹریڈ ہب: ٹیکنالوجی اور کاروبار کو جوڑنے کے لیے ایک مرکزی پلیٹ فارم مہیا کیا جائے گا۔
وزیراعلیٰ نے اس منصوبے کو "تخلیقی معیشت” (Creative Economy) کے لیے اہم پیش رفت قرار دیتے ہوئے کہا کہ اس سے ہزاروں براہِ راست اور بالواسطہ روزگار کے مواقع پیدا ہوں گے۔ اینیمیشن اور گیمنگ کے شعبوں میں پاکستان کا نام روشن ہوگا اور یہ سٹی ٹیلنٹ و ٹیکنالوجی کا سنگم ثابت ہوگا۔
یہ عظیم الشان منصوبہ مختلف مراحل میں مکمل کیا جائے گا، جس کی مزید تفصیلات جلد جاری کی جائیں گی۔ ثقافتی حلقوں نے مریم نواز شریف کے اس اقدام کو سراہتے ہوئے انہیں "ثقافتی ورثے کا نجات دہندہ” قرار دیا ہے، جس نے مرجھاتی ہوئی فلمی صنعت میں نئی جان پھونک دی ہے۔