نیویارک (نیوز ڈیسک): دنیا کے بااثر ترین افراد کی فہرست میں شامل شخصیات کے اعزاز میں منعقدہ ‘ٹائم 100 گالا’ میں نیتا امبانی نے اپنی روایتی خوبصورتی اور نایاب ترین جواہرات سے ریڈ کارپٹ پر آگ لگا دی۔ 62 سالہ نیتا امبانی نے اس موقع پر ایک ایسا ہیرا پہنا جو نہ صرف نایاب ہے بلکہ اپنی ایک تاریخی حیثیت بھی رکھتا ہے۔
نیتا امبانی کے ہار (Necklace) کی خاص بات اس میں جڑا 101 قیراط کا گلابی اور بھورا ہیرا تھا، جس کا تعلق تاریخی ’نظامی‘ (Nizami) خاندان سے بتایا جاتا ہے۔
اس میگا ہیرے کو بصرہ کے نایاب موتیوں کی چھ تہوں والے ہار میں سیٹ کیا گیا تھا۔پریس ریلیز کے مطابق، یہ ہیرا ‘اولڈ مائن روز کٹ’ (Old Mine Rose-cut) طرز کا ہے، جو اپنی نوعیت کا واحد شاہکار ہے۔
نیتا امبانی نے ‘سودیش’ (Swadesh) کی تیار کردہ ہاتھ سے بنی ہوئی بنارسی ساڑھی کے ساتھ مشہور فیشن ڈیزائنر منیش ملہوترا کا تیار کردہ ہینڈ کرافٹڈ بلاؤز پہن رکھا تھا۔انہوں نے ہیرے اور موتیوں کے جھمکے اور ایک ایسی انگوٹھی بھی پہنی جس میں گلابی ناشپاتی نما ہیرا جڑا ہوا تھا۔
تقریب کے دوران ریلائنس فاؤنڈیشن کی بانی اور چیئرپرسن نیتا امبانی نے صرف فیشن سے ہی متاثر نہیں کیا بلکہ ایک اہم کاروباری سنگ میل کا بھی اعلان کیا۔ انہوں نے بھارت کے ابھرتے ہوئے ستاروں اور بااثر نوجوانوں کے لیے ’TIME100 Next India‘ لانچ کرنے کا باضابطہ اعلان کیا، جو ٹائم میگزین کے عالمی فرنچائز کا نیا ایڈیشن ہے۔