اسلام آباد :پاکستان کے مختلف حصوں میں موسم کی انگڑائی نے ایک بار پھر سردی کی شدت میں اضافے اور بالائی علاقوں میں سفیدی کی چادر بچھنے کے امکانات روشن کر دیے ہیں۔
یشنل ڈیزاسٹر مینجمنٹ اتھارٹی (NDMA) نے ملک کے مختلف حصوں میں گرج چمک کے ساتھ بارش، ژالہ باری اور پہاڑی علاقوں میں برفباری کے پیشِ نظر ہائی الرٹ جاری کر دیا ہے۔ ترجمان این ڈی ایم اے کے مطابق، آئندہ 12 سے 24 گھنٹوں کے دوران ملک کے طول و عرض میں موسمیاتی تبدیلیاں رونما ہونے کا قوی امکان ہے، جس سے درجہ حرارت میں نمایاں کمی متوقع ہے۔
رپورٹ کے مطابق، گلگت بلتستان اور آزاد کشمیر سمیت خیبر پختونخوا کے بالائی اور پہاڑی علاقوں میں شدید برفباری کا امکان ظاہر کیا گیا ہے۔ اس کے ساتھ ساتھپنجاب اور اسلام آباد دارالحکومت سمیت پنجاب کے وسطی اور جنوبی علاقوں میں تیز ہواؤں کے ساتھ بارش اور بعض مقامات پر ژالہ باری (Hailstorm) کی پیشگوئی کی گئی ہے۔
سندھ اور بلوچستان: کراچی، اندرونِ سندھ اور بلوچستان کے مختلف شہروں بشمول کوئٹہ میں گرج چمک کے ساتھ ابرِ کرم برسنے کا امکان ہے۔
خیبر پختونخوا: صوبے کے میدانی علاقوں میں بارش جبکہ بلند و بالا چوٹیوں پر برفباری کا سلسلہ جاری رہنے کی توقع ہے۔
این ڈی ایم اے نے خبردار کیا ہے کہ مسلسل بارشوں اور برفباری کے باعث پہاڑی شاہراہوں پر پھسلن بڑھ سکتی ہے، جس سے ٹریفک کی روانی متاثر ہونے اور لینڈ سلائیڈنگ کے واقعات کا خدشہ ہے۔
سیاحوں اور مسافروں کو مشورہ دیا گیا ہے کہ وہ بالائی علاقوں کی جانب غیر ضروری سفر سے مکمل گریز کریں اور سفر شروع کرنے سے پہلے شاہراہوں کی تازہ ترین صورتحال معلوم کر لیں۔
شہری خراب موسم کے دوران بجلی کے کھمبوں اور بوسیدہ عمارتوں سے دور رہیں اور ہنگامی صورتحال میں مقامی انتظامیہ سے رابطہ کریں۔