تہران/واشنگٹن : مشرقِ وسطیٰ میں لگی آگ اب ایک ایسے جوالا مکھی میں بدل چکی ہے جس نے عالمی طاقتوں کو براہِ راست ٹکراؤ کے دہانے پر لا کھڑا کیا ہے۔ جنگ کے 36 ویں دن ایران کی سرزمین پر امریکی کمانڈوز اور ایرانی ملیشیا کے درمیان ”چوہے بلی“ کا کھیل شروع ہو چکا ہے، جبکہ اسرائیل اور خلیجی ممالک میں ہولناک تباہی کی اطلاعات موصول ہو رہی ہیں۔
ایران میں خونریز ریسکیو آپریشن: امریکی کمانڈوز کی انٹری
برطانوی اخبار ’ٹیلی گراف‘ کے مطابق، ایران کی فضائی حدود میں امریکی لڑاکا طیارہ گرائے جانے کے بعد، لاپتہ پائلٹ کو بچانے کے لیے امریکی اسپیشل فورسز ایران کے اندر داخل ہو گئی ہیں۔
پہلا معرکہ: جمعہ کے روز ایک پائلٹ کو بحفاظت نکال لیا گیا، تاہم دوسرے پائلٹ کی تلاش جاری ہے۔
ایرانی میڈیا نے پائلٹ کی گرفتاری میں مدد دینے پر 60 ہزار ڈالر انعام کا اعلان کیا ہے، جس کے بعد خوزستان کے بختیاری قبائل مسلح ہو کر پہاڑوں میں امریکی پائلٹ کا شکار کرنے نکل پڑے ہیں۔
فضا میں تباہی: اے-10، ایف-15 اور بلیک ہاک نشانے پر
ایرانی دفاعی نظام نے امریکی فضائیہ کو شدید نقصان پہنچایا ہے۔
آبنائے ہرمز کے قریب ایک A-10 وارتھوگ طیارہ تباہ ہوا جس کے پائلٹ کو بچا لیا گیا۔
ریسکیو آپریشن کے دوران ایرانی حملے میں دو امریکی ہیلی کاپٹروں اور ایک ری فیولنگ طیارے کو نشانہ بنایا گیا، جبکہ مہر نیوز کے مطابق ایک بلیک ہاک ہیلی کاپٹر کو مار گرایا گیا ہے۔
کویت میں امریکی اڈے پر ڈرون حملہ
ایران کے ’پریس ٹی وی‘ نے دعویٰ کیا ہے کہ کویت کے کیمپ بوہرنگ میں تعینات امریکی فوج کے مشہور CH-47 چنوک ہیلی کاپٹر کو ایرانی خودکش ڈرون نے نشانہ بنایا، جس سے ہیلی کاپٹر کو شدید نقصان پہنچا ہے۔ یہ حملہ امریکی سپلائی لائن کے لیے بڑا دھچکا تصور کیا جا رہا ہے۔
اسرائیل اور بحرین: جنگ اب صرف فوجی اڈوں تک محدود نہیں رہی:
ایرانی میزائلوں نے تل ابیب سمیت رہائشی علاقوں کو نشانہ بنایا، جہاں کلسٹر بموں کے استعمال کی اطلاعات ہیں۔
منامہ کے رہائشی علاقے میں ایک بڑا میزائل گرا جسے انٹرسیپٹر روکنے میں ناکام رہا۔
جنوبی لبنان میں حزب اللہ نے اسرائیلی ہیلی پیڈ پر راکٹوں کا پانچواں بڑا حملہ کیا، جس سے اسرائیلی فورسز کو اپنے زخمی نکالنے میں شدید مشکلات کا سامنا ہے۔
امریکی اسپیشل فورسزایران میں داخل، ایف-15 پائلٹ کے سر کی قیمت مقرر؛ اسرائیل اور خلیج پر میزائلوں کی برسات، چنوک ہیلی کاپٹر راکھ کا ڈھیر
