پنجاب بھر میں دہ ش ت گردی کا بڑا نیٹ ورک بے نقاب

لاہور:پنجاب میں دہشت گردی کے خدشات کے پیش نظر محکمہ انسداد دہشت گردی (سی ٹی ڈی) نے ایک ماہ کے دوران خفیہ اطلاعات پر مبنی 366 انٹیلیجنس بیسڈ آپریشنز کیے، جن کے نتیجے میں ایک بڑا دہشت گرد نیٹ ورک بے نقاب ہو گیا۔

ترجمان سی ٹی ڈی کے مطابق ان کارروائیوں کے دوران 36 خطرناک دہشت گردوں کو گرفتار کیا گیا، جن میں بعض کا تعلق کالعدم تنظیم فتنہ الخوارج سے بتایا گیا ہے۔ سی ٹی ڈی کی کارروائیاں لاہور، قصور، جہلم، چکوال، اوکاڑا، خانیوال، راولپنڈی، چنیوٹ، ٹوبہ ٹیک سنگھ، راجن پور، سیالکوٹ، جھنگ، اٹک اور ساہیوال سمیت متعدد اضلاع میں کی گئیں، جہاں دہشت گرد مبینہ طور پر مختلف مقامات کو نشانہ بنانے کی منصوبہ بندی کر رہے تھے۔ خاص طور پر فیصل آباد اور جہلم سے دو انتہائی خطرناک دہشت گرد بارودی مواد سمیت گرفتار کیے گئے، جن کے بارے میں بتایا گیا کہ ان کا تعلق علاقہ غیر سے ہے۔ ترجمان کے مطابق گرفتار ملزمان سے بڑی مقدار میں دھماکہ خیز مواد برآمد ہوا، جس میں 5 آئی ای ڈی بم، 34 ڈیٹونیٹر، 61 فٹ حفاظتی فیوز وائر، پمفلٹس اور نقدی شامل ہیں۔ حکام کا کہنا ہے کہ دہشت گرد عوام میں خوف و ہراس پھیلانے کے لیے مختلف مقامات پر کارروائیوں کی منصوبہ بندی کر رہے تھے، تاہم بروقت کارروائی نے ان کے عزائم ناکام بنا دیے۔
گرفتار دہشت گردوں کی شناخت نثار احمد، باچا خان، انس، خضر، غضنفر، سبز علی، سردار خان، زمان، فیض، نظیر، رب نواز، محفوظ، مسلم، جمیل سمیت دیگر ناموں سے ہوئی ہے۔