پشاور:خیبرپختونخواہ کے علاقہ لکی مروت میں خفیہ اطلاع پر کیے جانے والے آپریشن میں 6 دہشت گرد ہلاک ہوگئے۔ تفصیلات کے مطابق کاؤنٹر ٹیررازم ڈپارٹمنٹ (سی ٹی ڈی) بنوں ریجن کی جانب سے لکی مروت کے علاقے شاگئی میں انٹیلی جنس بیسڈ آپریشن کیا گیا اور اس آپریشن کے دوران 6 دہشت گردوں کو ہلاک کر دیا گیا، سی ٹی ڈی ذرائع نے بتایا کہ شاگئی میں کارروائی کے دوران فائرنگ کے تبادلے 6 دہشتگرد مارے گئے۔
سی ٹی ڈی ذرائع کا کہنا ہے کہ یہ آپریشن تقریباً 40 منٹ تک جاری رہا، سی ٹی ڈی کی اس کارروائی میں دہشت گردوں کے مزید ساتھی فرار ہو گئے جب کہ ہلاک ہونے والے دہشت گردوں کی شناخت کا عمل جاری ہے، مارے جانے والے ان دہشتگردوں کے قبضے سے 4 کلاشنکوف، 2 پستول، 8 دستی بم اور آئی ای ڈی برآمد ہوئے۔
بتایا جارہا ہے کہ جمعہ کو لکی مروت دھماکے میں شہید 7 اہلکاروں کی نماز جنازہ پولیس لائن میں ادا کردی گئی، لکی مروت کے قبائلی سب ڈویژن بیٹنی میں پولیس موبائل کے قریب دھماکے میں ایس ایچ او سمیت 7 اہلکار شہید ہو گئے تھے، ترجمان لکی مروت پولیس نے بتایا تھا کہ پولیس موبائل پر ہونے والے دھماکے میں 6 اہلکار شہید اور ایک اہلکار زخمی ہوا، زخمی اہلکار کو انصاف الدین ہسپتال منتقل کیا گیا جہاں وہ بھی زخموں کی تاب نہ لاتے ہوئے دم توڑ گیا، شہید افراد میں ایس ایچ او تھانہ شادی خیل صدر اعظم بھی شامل تھت، اس کارروائی کیلئے دھماکہ خیز مواد پولیس موبائل کے قریب نصب تھا، دھماکے کے بعد علاقے میں پولیس کی اضافی نفری روانہ کی گئی تھی۔