لاہور:(ملک ظہیر) مغربی سرحدی صورتحال اور سیکیورٹی کے حالیہ خطرات کے پیشِ نظر آئی جی پنجاب عبدالکریم کی ہدایت پر صوبہ بھر میں انٹیلی جنس بیسڈ اور کومبنگ آپریشنز کا سلسلہ تیز کر دیا گیا ہے۔ ترجمان پنجاب پولیس کے مطابق گزشتہ 24 گھنٹوں کے دوران لاہور سمیت تمام اضلاع میں بڑے پیمانے پر کارروائیاں عمل میں لائی گئی ہیں۔
پنجاب پولیس کی جانب سے جاری کردہ اعداد و شمار کے مطابق سیکیورٹی فورسز نے دشمن عناصر کے خلاف گھیرا تنگ کر دیا ہے۔
انٹیلی جنس بیسڈ آپریشنز: صوبہ بھر میں 63 خفیہ کارروائیاں کی گئیں جن میں 1705 افراد سے پوچھ گچھ کے بعد 6 اہم جرائم پیشہ افراد کو حراست میں لیا گیا۔
کومبنگ آپریشنز: لاہور سمیت مختلف ڈویژنز میں 609 کومبنگ آپریشنز کیے گئے۔ اس دوران 20 ہزار سے زائد افراد کی بائیومیٹرک تصدیق اور اسکریننگ کی گئی، جس کے نتیجے میں 129 مشتبہ و جرائم پیشہ افراد کو گرفتار کیا گیا۔
ترجمان پنجاب پولیس کے مطابق ان کارروائیوں کے دوران ملک دشمن عناصر کے قبضے سے بھاری مقدار میں غیر قانونی اسلحہ برآمد کیا گیا ہے، جس میں 2 رائفلز، 15 پسٹلز، 1 بندوق اور درجنوں کی تعداد میں زندہ گولیاں شامل ہیں۔
آئی جی پنجاب عبدالکریم نے تمام آر پی اوز اور ڈی پی اوز کو ہدایت دی ہے کہ ملک دشمن اور شرپسند عناصر کے محاسبے کے لیے انٹیلی جنس بیسڈ آپریشنز کی رفتار میں کمی نہ لائی جائے۔ انہوں نے واضح کیا کہ دہشت گردوں اور شرپسندوں کے مکمل تدارک کے لیے ‘ڈور ناکنگ’ (گھر گھر تلاشی) کا عمل مسلسل جاری رکھا جائے تاکہ کسی بھی ناخوشگوار واقعے سے پہلے ہی خطرات کو کچلا جا سکے۔
پنجاب پولیس کے مطابق یہ خصوصی مہم اس وقت تک جاری رہے گی جب تک سرحدوں سے ملحقہ اور اندرونی علاقوں میں امن و امان کی صورتحال مکمل طور پر قابو میں نہیں آ جاتی۔