وزیراعظم کا جی ایچ کیو کا دورہ، عسکری قیادت کی پاکستان افغانستان صورتحال پر بریفنگ،افواجِ پاکستان کی پیشہ ورانہ صلاحیتوں کو سراہا

راولپنڈی :وزیرِ اعظم محمد شہباز شریف نے جنرل ہیڈ کوارٹرز (جی ایچ کیو) کا دورہ کیا جہاں عسکری قیادت نے انہیں پاکستان افغانستان کی صورتحال پر مفصل بریفنگ دی۔
وزیرِ اعظم نے کہا کہ فتنہ الخوارج اور افغان طالبان رجیم کے گٹھ جوڑ اور شرپسند کارروائیوں کے لیے زیرو ٹالرنس اپنائی جائے ۔ انہوں نے واضح کیا کہ افغان طالبان رجیم اور فتنہ الخوارج کی پاکستان کے خلاف کارروائیاں ناقابل قبول ہیں۔
انہوں نے کہا کہ چیف آف آرمی اسٹاف اور چیف آف ڈیفنس فورسز،فیلڈ مارشل سید عاصم منیر کی قیادت میں افواجِ پاکستان ملک کی حفاظت کے لیے ہر دم تیار ہیں اور پاکستان کسی بھی جارحیت کے خلاف اپنا دفاع کرنا بخوبی جانتا ہے۔
وزیرِ اعظم نے افغان طالبان رجیم کے سرحدی علاقوں میں حملوں کو پسپا کرنے اور بھرپور جوابی کارروائی پر افواجِ پاکستان کی پیشہ ورانہ صلاحیتوں کو سراہا۔ انہوں نے کہا کہ پوری قوم ارضِ وطن کی حفاظت کے لیے اپنی افواجِ پاکستان کے شانہ بشانہ کھڑی ہے۔