سپیکر پنجاب اسمبلی کا پاک فوج کو زبردست خراجِ تحسین: آپریشن "غضب للحق” کو پوری قوم کے جذبات کی ترجمانی قرار دے دیا

لاہور: سپیکر پنجاب اسمبلی ملک محمد احمد خان نے پاک فوج کی جانب سے فتنہ الخوارج کے خلاف حالیہ کامیاب آپریشن "غضب للحق” کو شاندار الفاظ میں سراہتے ہوئے اسے دفاعِ وطن کے لیے ایک سنگِ میل قرار دیا ہے۔ انہوں نے واضح کیا کہ دشمن کی جانب سے کی جانے والی بلاجواز جارحیت کا بھرپور جواب دینا وقت کی ضرورت تھی۔
سپیکر پنجاب اسمبلی نے پاک فوج کے جوانوں کی جرات و بہادری کو خراجِ تحسین پیش کرتے ہوئے کہا:”پاکستان کی سرحدیں ایک آہنی دیوار کی مانند ہیں، ان سے ٹکرانے والا ہر فتنہ پاش پاش ہو جائے گا۔”
انہوں نے ان غازیوں کو سلام پیش کیا جنہوں نے اپنی جانوں پر کھیل کر وطن کی سرحدوں کو ناقابلِ عبور بنا دیا ہے۔
ملک محمد احمد خان نے فتنہ الخوارج اور ان کے ہینڈلرز کو مخاطب کرتے ہوئے کہا کہ پاکستان اب خاموش نہیں رہے گا بلکہ دشمن کو اسی زبان میں جواب دیا جائے گا جو وہ سمجھتے ہیں۔ ان کا کہنا تھا کہ پاکستان کی سالمیت پر حملہ کرنے والوں کو اب ہر محاذ پر عبرتناک شکست کا سامنا کرنا پڑے گا۔
اپنے بیان کے آخر میں سپیکر پنجاب اسمبلی نے اس عزم کا اعادہ کیا کہ پاکستان ایک ناقابلِ تسخیر ریاست ہے اور انشا اللہ ہمیشہ رہے گی۔ انہوں نے "پاکستان زندہ باد، تا قیامت پاکستان پائندہ باد” کے نعرے کے ساتھ افواجِ پاکستان کے ساتھ مکمل یکجہتی کا اظہار کیا۔