"آپریشن غضب للحق” خوارج کے لیے واضح پیغام ہے، دشمن جان لے کہ ہمارا صبر لبریز ہو چکا: مریم نواز شریف، پاک فوج کو شاندار خراجِ تحسین

لاہور: وزیراعلیٰ پنجاب مریم نواز شریف نے پاک فوج کے حالیہ "آپریشن غضب للحق” کی بھرپور حمایت کرتے ہوئے اسے پوری قوم کے جذبات کی اصل ترجمانی قرار دے دیا ہے۔ انہوں نے دشمن اور فتنہءِ خوارج کو سخت الفاظ میں متنبہ کیا ہے کہ اب پاکستان کی سلامتی سے کھیلنے والوں کے خلاف آہنی ہاتھوں سے نمٹا جائے گا۔
وزیراعلیٰ مریم نواز نے اپنے بیان میں دو ٹوک موقف اختیار کرتے ہوئے کہا:”پاکستان کی جانب جو میلی آنکھ اٹھے گی وہ نوچ لی جائے گی اور جو ہاتھ اٹھے گا اسے توڑ دیا جائے گا۔”
انہوں نے واضح کیا کہ پاکستان کی سرحدیں ایک آہنی دیوار ہیں، جس سے ٹکرانے والا ہر فتنہ پاش پاش ہو جائے گا۔
مریم نواز کا کہنا تھا کہ اب دشمن کو اسی زبان میں جواب دیا جائے گا جو اسے سمجھ آتی ہے۔
وزیراعلیٰ نے آپریشن غضب للحق کی کامیابی پر پاک فوج کے جوانوں کو خراجِ تحسین پیش کرتے ہوئے کہا:
"سلام ہے ان غازیوں پر جنہوں نے ایک بار پھر ثابت کر دیا کہ پاکستان کی سرحدیں ناقابلِ عبور ہیں۔ آپریشن غضب للحق خوارج کے لیے یہ پیغام ہے کہ پاکستان کے صبر کا پیمانہ اب لبریز ہو چکا ہے۔”
قومی سلامتی پر کسی قسم کا سمجھوتہ نہ کرنے کا عزم دہراتے ہوئے انہوں نے کہا کہ ہم اپنے شہداء کے خون کے ایک ایک قطرے کا حساب لیں گے۔ انہوں نے اس یقین کا اظہار کیا کہ پاکستان ایک ناقابلِ تسخیر ملک تھا، ہے اور انشا اللہ ہمیشہ رہے گا۔