لندن :برطانیہ کی پاپ گلوکارہ اولیویا ڈین نے گریمی کا بہترین گلوکارہ کا ایوارڈ حاصل کر لیا ہے جبکہ ہپ ہاپ میگاسٹار کینڈرک لامر کے’جی این ایکس‘ کو بہترین البم قرار دیا گیا ہے۔
برطانوی خبر رساں ادارے روئٹرز کے مطابق 68 ویں گریمی ایوارڈز کی تقریب اتوار کو لاس اینجلس میں منعقد ہوئی۔
لندن میں پیدا ہونے والی 26 سالہ اولیویا ڈین کے ساتھ دوڑ میں لیون تھامس، کیٹسی، دی ماریاس، ایڈیسن رائے، سومبر، ایلیکس ویرن اور لولا ینگ بھی شامل تھیں تاہم اولیویا سب سے آگے نکلتے ہوئے اعزاز کی حقدار ٹھہریں۔انہوں نے انعام وصول کرتے ہوئے اپنی دادی کو خراج تحسین پیش کیا جو ٹین ایج کے دوران ایک نئی زندگی کی تلاش میں گیانا سے برطانیہ ہجرت کر گئی تھیں۔
ان کا کہنا تھا کہ ’میں یہ ضرور کہنا چاہتی ہوں کہ میں ایک تارک وطن کی پوتی ہوں۔‘
اس کے ساتھ ہی ہال میں موجود سٹارز اور بڑی تعداد میں سامعین نے تالیاں بجا کر انہیں خراج تحسین پیش کیا۔
اولیویا نے خوشی کا اظہار کرتے ہوئے مزید کہا کہ ’میں بہادری کی پیداوار ہوں اور میرے خیال میں ایسے لوگ خوشیاں منانے کا حق رکھتے ہیں اور ہم ایک دوسرے کے بغیر کچھ بھی نہیں۔‘
علاوہ ازیں 38 سالہ کینڈرک لامر جن کو بڑے ریپ فنکاروں میں شامل کیا جاتا ہے، ان 9 نامزدگیوں میں شامل تھے جو کمیٹی کی جانب سے کی گئیں تاہم پھر وہ سب سے آگے نکلتے ہوئے پہلے نمبر پر پہنچ گئے اور ان کے البم ’جی این ایکس‘ کو بہترین ریپ البم کا ایوارڈ دیا گیا۔
لامر کا یہ البم سال کے بہترین البم کی دوڑ میں بھی شامل ہے جس میں ان کو پورٹو ریکن کے ریپر بیڈ بنی اور لیڈی گاگا کی جانب سے سخت مقابلے کا سامنا ہے۔یہ ایوار پچھلے برس بیوس کے کاؤ بوائے کارٹر نے حاصل کیا تھا۔
اسی طرح اگر لامر کا البم سال کے بہترین البم کا ایوارڈ بھی حاصل کر لے تو وہ پہلے میل سولو گلوکار ہوں گے جو یہ اعلیٰ ایوارڈ حاصل کریں گے۔
اس سے قبل اس کیٹیگری کے ایوارڈ دو خواتین فنکاروں لورین ہل اور ڈوو اوکسٹ کو مل چکے ہیں۔
اگر یہ ایوارڈ لیڈی گاگا کے البم کو ملتا ہے تو یہ ان کے کیریئر کا پہلا بڑا ایوارڈ ہو گا۔ اگرچہ وہ دو دہائیوں سے زیادہ عرصہ موسیقی کے میدان میں گزار چکی ہیں تاہم ابھی تک گریمی کے پلیٹ فارم سے کوئی ایوارڈ نہیں جیت سکی ہیں۔
ایونٹ میں موسیقی کی دنیا سے تعلق رکھنے والے دیگر فنکاروں کو بھی ایوارڈ دیے گئے۔
اس بار وہ اپنے البم ’میہم‘ کے ساتھ مقابلے میں شامل ہیں، جس کو ناقدین ان کی ڈانس کے پاپ روٹس کی طرف واپسی قرار دیتے ہیں۔
ٹریوور نوح نے چھٹی بار ایونٹ کی میزبانی کی اور کہا جا رہا ہے کہ ان کا آخری ایمی ایونٹ ہو سکتا ہے۔
اس شو کو سی بی ایس نیٹ ورک پر نشر کیا گیا۔