لاہور : وزیراعلیٰ پنجاب مریم نواز شریف نے ماں اور بچی کے ساتھ پیش آنے والے دردناک واقعے پر شدید رنج و غم اور دلی افسوس کا اظہار کیا ہے۔ انہوں نے واقعے پر گہرے دکھ کا اظہار کرتے ہوئے کہا کہ "ایک ماں کا دکھ ایک ماں ہی سمجھ سکتی ہے۔” وزیراعلیٰ نے اس المناک واقعے کو انتظامیہ کی مجرمانہ غفلت اور لاپرواہی قرار دیتے ہوئے اس کے خلاف ’اعلانِ جنگ‘ کر دیا ہے۔
وزیراعلیٰ مریم نواز نے معاملے کی سنگینی کو دیکھتے ہوئے بھکر کے دورے سے واپسی پر گھر جانے کے بجائے سیدھا ایئرپورٹ پر ہی ہنگامی اجلاس طلب کر لیا۔ انہوں نے ریسکیو آپریشن میں موجود تمام متعلقہ اداروں کے حکام کو کٹہرے میں کھڑا کرتے ہوئے سخت بازپرس کا فیصلہ کیا ہے۔
اجلاس کے دوران وزیراعلیٰ نے پولیس، ریسکیو 1122، واسا اور ضلعی انتظامیہ کو سخت ہدایات جاری کیں کہ واقعے سے متعلق تمام پہلوؤں پر مبنی ایک مکمل اور غیر جانبدار فیکٹ فائنڈنگ رپورٹ فوری طور پر پیش کی جائے۔
ذرائع کے مطابق، وزیراعلیٰ مریم نواز بھکر میں اپنی سرکاری مصروفیات کے دوران بھی مسلسل اس دلخراش واقعے کی لمحہ بہ لمحہ رپورٹ لیتی رہیں۔ انہوں نے واضح عندیہ دیا ہے کہ فیکٹ فائنڈنگ رپورٹ کی روشنی میں ذمہ داروں کے خلاف فوری اور سخت ترین کارروائی عمل میں لائی جائے گی۔
وزیراعلیٰ نے مزید تنبیہ کی کہ ریسکیو آپریشن کے دوران متضاد اور غیر مستند اطلاعات فراہم کرنے والے تمام افسران اور اداروں کے خلاف بھی سخت محکمانہ کارروائی کی جائے گی۔