گینگسٹرز کیخلاف کریک ڈاؤن،سدھو موسے والا کے قتل میں ملوث گولڈی برار کے والدین گرفتار

امرت سر: بھارتی پولیس نےگینگسٹر ستیندرجیت سنگھ عرف گولڈی برار کے والدین کو گرفتار کر لیا ہے۔
ٹریبیون انڈیا کے مطابق ریاست پنجاب کے مکتسر ضلع کی پولیس نے امرتسر کے علاقے میں ایک چھاپے کے دوران انہیں حراست میں لیا۔
یہ گرفتاری ایسے وقت میں سامنے آئی ہے جب پولیس کی جانب سے گینگسٹرز اور ان کے نیٹ ورکس کے خلاف کریک ڈاؤن کا سلسلہ تیز کیا گیا ہے۔گرفتاری کی کارروائی میں شامل ایس ایچ او درشن سنگھ نے میڈیا کو بتایا کہ گولڈی برار کے والدین کو اودے کرن گاؤں کے رہائشی کی جانب سے درج کرائی شکایت کی بنا پر گرفتار کیا گیا ہے جس میں ان پر بھتے لینے کا الزام لگایا گیا۔
گولڈی برار کے والد شمشیر سنگھ اور والدہ منریت کور کوٹکپورہ روڈ پر واقع علاقے ادیش نگر کے رہنے والے ہیں جبکہ آبائی لحاظ سے اس خاندان کا تعلق ضلع فرید کوٹ سے ہے۔
شمشیر سنگھ خود بھی محکمہ پولیس میں بطور سب انسپکٹر خدمات انجام دے چکے ہیں اور 2021 میں مکتسر ضلع میں ہونے والی قتل کی ایک واردات میں مبینہ طور پر ملوث ہونے پر ان کو جبری طور پر ریٹائرڈ کر دیا گیا تھا۔
گولڈی برابر مشہور پنجابی گلوکار اور سیاست دان سدھو موسے والا کے قتل کے مقدمے میں مطلوب اور اشتہاری ہے، ان کو 2022 میں ضلع مانسا میں قتل کیا گیا تھا۔انڈیا کے تفتیشی ادارے نیشنل انویسٹی گیشن ایجنسی کی جانب سے 2024 میں جاری کیے گئے ایک نوٹس میں بتایا گیا تھا کہ ممکنہ طور پر گولڈی برار کے امریکہ یا کینیڈا میں موجود ہو سکتے ہیں اور وہ مبینہ طور پر 2017 میں سٹوڈنٹ ویزے پر کینیڈا گئے تھے۔
گولڈی برار اس سے قبل لارنس بشنوئی گینگ کے ساتھ بھی وابستہ رہے ہیں تاہم بعدازاں پچھلے برس یہ اطلاع بھی سامنے آئی تھی کہ وہ اس گینگ سے الگ ہو چکے ہیں۔
2024 میں انڈیا کی وزارت داخلہ نے گولڈی برار کو اَن لا فل ایکٹیویٹیز پریوینشن ایکٹ کے تحت ’انفرادی دہشت گرد‘ قرار دیا تھا۔