لاہور:لاہور کی نجی یونیورسٹی میں ایک افسوسناک واقعہ پیش آیا ہے، جہاں ڈی فارمیسی کی ایک طالبہ نے مبینہ طور پر خودکشی کی کوشش کی ہے۔
پولیس اور انتظامیہ کے مطابق فاطمہ نامی طالبہ نے مبینہ طور پر یونیورسٹی کی چوتھی منزل سے چھلانگ لگا کر خودکشی کی کوشش کی۔
ریسکیو حکام نے واقعے کی اطلاع ملتے ہی ٹیم موقع پر پہنچ کر فوری طبی امداد دی اور زخمی طالبہ کو اسپتال منتقل کر دیا۔
اسپتال ذرائع کے مطابق طالبہ فاطمہ کو طبی امداد دی جا رہی ہے اور ان کی حالت نازک بتائی گئی ہے۔
ابتدائی رپورٹ کے مطابق طالبہ نے اسی جگہ سے خودکشی کی کوشش کی جہاں چند روز قبل اویس سلطان نامی طالب علم نے چھلانگ لگا کر خودکشی کی تھی۔
یونیورسٹی انتظامیہ نے اس واقعے کے بعد جامعہ کے تمام دروازے بند کر دئیے ہیں اور یونیورسٹی کو غیر معینہ مدت کے لیے بند کرتے ہوئے آن لائن کلاسز کا نوٹیفکیشن جاری کر دیا ہے۔
حکام نے واقعے کی وجوہات جاننے کیلئے تحقیقات شروع کر دی ہیں۔خود کشی کرنے والی 21 سالہ طالبہ فاطمہ شیخوپورہ کے علاقہ نارنگ منڈی کی رہائشی تھی۔یونیورسٹی انتظامیہ کے مطابق بچی کا تین ماہ قبل داخلہ ہوا تھا اور ابھی تک اس کا سی جی پی اے 3.14 تھا۔ بچی کی حاضری بھی مکمل تھی یونیورسٹی انتظامیہ کی اب تک کی تحقیقات کے مطابق بچی کو یونیورسٹی سے کسی قسم کا کوئی مسئلہ نہیں تھا۔ فاطمہ آج اپنی والدہ کے ہمراہ یونیورسٹی پہنچی تھی۔یونیورسٹی کی تحقیقاتی کمیٹی اویس سلطان اور فاطمہ کے اس خودکشی کے کیس کے حوالے سے تحقیقات کر رہی ہے
