لاہور: وزیر اطلاعات پنجاب عظمیٰ زاہد بخاری نے کہا ہے کہ ترجمان پاک فوج نے بانی پی ٹی آئی کا ملک دشمن ایجنڈا بے نقاب کر دیا۔بھارتی میڈیا کی گود میں بیٹھ کر پاکستان کے خلاف بیانیہ بنانے والے ذہنی مریض کو قوم نے پہچان لیا ہے۔
عظمیٰ بخاری نے کہا کہ ذہنی مفلوج بانی پی ٹی آئی اقتدار میں آنے کیلئے طالبان اور بھارت کی سپورٹ حاصل کر رہا ہے اور بنیان مرصوص کے سپہ سالار پر فضول گوئی اس کے ذہنی و اخلاقی مفلوج ہونے کا ثبوت ہے۔ وزیر اطلاعات پنجاب نے مزید کہا کہ پاکستان کے خلاف کام کرنے والے چند چہرے ریاستی استحکام کے لیے واضح خطرہ ہیں، اور دشمن ایجنڈے پر چلنے والوں کو جان لینا چاہیے کہ ریاست ان کی ہر سازش ناکام بنائے گی۔
انہوں نے واضح کیا کہ ریاستی اداروں پر حملہ، شہداء کی توہین اور افواج کے خلاف بیانیہ سب دشمن کا ایجنڈا ہے، جسے قوم نے رد کر دیا ہے، اور پاکستان کی سلامتی کے خلاف ہر بیانیہ، سازش اور کردار ریاست کے فولادی عزم کے سامنے ریت کی دیوار ثابت ہوگا۔