راولپنڈی:چیف آف آرمی سٹاف و چیف آف ڈیفنس فورسزفیلڈ مارشل سید عاصم منیر،پاک بحریہ کے سربراہ ایڈمرل نوید اشرف اور پاک فضائیہ کےسربراہ ایئر چیف مارشل ظہیر احمد بابر سدھو نے پاکستان کی مسلح افواج کی جانب سےمیجر محمد اکرم شہید، نشانِ حیدر کے 54ویں یومِ شہادت پر خراجِ عقیدت پیش کیا ہے ۔
پاک فوج کے شعبہ تعلقات عامہ(آئی ایس پی آر) سے جاری بیان کے مطابق میجر محمد اکرم شہید نے 1971 میں ہلی سیکٹر (مشرقی پاکستان) میں 4 فرنٹیئر فورس رجمنٹ کی ایک کمپنی کی قیادت کرتے ہوئے غیر معمولی جرات اور ثابت قدمی کا مظاہرہ کیا۔19 مئی 1971 کو انہوں نے اپنی دفاعی پوزیشن کو مضبوطی سے تھامے رکھا اور دشمن کو کسی قسم کا جنگی فائدہ حاصل کرنے نہ دیا۔ بعد ازاں 3 دسمبر 1971 کو انہیں دشمن کے مضبوط قلعہ بند مورچوں پر حملے کا حکم ملا۔ وہ بے مثال عزم کے ساتھ پیش قدمی کرتے ہوئے دشمن کے تین ٹینک تباہ کرنے میں کامیاب ہوئے تاہم شدید زخمی ہونے کے باوجود وہ بہادری سے لڑتے رہے۔
5 دسمبر 1971 کو انہوں نے جامِ شہادت نوش کیا، اور جرات و فرض شناسی کی اعلیٰ ترین مثال قائم کی۔میجر محمد اکرم شہید کی لازوال بہادری پاکستان کی مسلح افواج کی ناقابلِ تسخیر روح کی روشن علامت ہے۔ ان کی قربانی آج بھی آنے والی نسلوں کے لیے مشعلِ راہ ہے اور وطنِ عزیز کی خودمختاری اور علاقائی سالمیت کے دفاع کے عزم کو مزید مضبوط کرتی ہے۔آج مسلح افواج پاکستان کے تمام شہداء کی لازوال قربانیوں کو خراجِ عقیدت پیش کرنے کے عزم کی تجدید کرتی ہیں۔ قوم اپنے بہادر سپوتوں پر ہمیشہ فخر کرتی رہے گی، جن کی قربانیاں تاریخِ پاکستان میں سنہری حروف سے لکھی گئی ہیں۔