مظفر آباد :کل جماعتی حریت کانفرنس (آزاد جموں و کشمیر و پاکستان شاخ) نے بھارتی جیلوں میں دہائیوں سے قید کشمیری حریت قائدین و کارکنان کی بدترین حالت اور انسانی حقوق کی پامالیوں پر گہری تشویش اور افسوس کا اظہار کیا ہے۔
اسلام آباد سے جاری اپنے بیان میں کل جماعتی حریت کانفرنس کے کنوینر غلام محمد صفی نے کہا کہ ان رہنماؤں کا واحد جرم یہ ہے کہ وہ اپنے قوم کے اس پیدائشی اور بین الاقوامی طور پر تسلیم شدہ حقِ خودارادیت کا مطالبہ کر رہے ہیں، جو خود اقوام متحدہ نے کشمیری عوام کو عطا کیا تھا۔
انہوں نے کہا کہ 77 سال قبل بھارت نے خود مسئلہ کشمیر کو اقوام متحدہ میں پیش کیا اور یہ وعدہ کیا تھا کہ کشمیری عوام کو اپنے مستقبل کے فیصلے کا حق استصوابِ رائے کے ذریعے دیا جائے گا۔
بھارتی وزیر اعظم پنڈت جواہر لعل نہرو نے سرینگر میں اعلان کیا تھا کہ بھارت کا فوجی اقدام عارضی ہے اور جیسے ہی امن بحال ہوگا، فوج واپس چلی جائے گی۔
غلام محمد صفی نے افسوس کا اظہار کرتے ہوئے کہا کہ بھارت نے نہ صرف اپنے وعدے سے انکار کیا بلکہ ان رہنماؤں کو جو اس وعدے کی یاد دہانی کرواتے ہیں، من گھڑت الزامات کے تحت جیلوں میں ڈال دیا ہے۔۶۷۶۷۷ان میں سے بیشتر رہنما سنگین بیماریوں میں مبتلا ہیں، مگر انہیں علاج اور بنیادی انسانی حقوق تک رسائی نہیں دی جا رہی، جو اقوام متحدہ کے انسانی حقوق کے چارٹر اور نیلسن منڈیلا رولز کی صریح خلاف ورزی ہے۔
کل جماعتی حریت کانفرنس نے اقوام متحدہ، یورپی یونین، اسلامی تعاون تنظیم (او آئی سی) اور عالمی انسانی حقوق کی تنظیموں سے مطالبہ کیا ہے کہ وہ بھارت پر دباؤ ڈالیں تاکہ تمام حریت قائدین و کارکنان کو فوری طور پر رہا کیا جائے۔ جموں و کشمیر میں سیاسی جبر و استحصال کا سلسلہ ختم کیا جائے۔ کشمیریوں کو اقوام متحدہ کی قراردادوں کے مطابق حقِ خودارادیت دیا جائے۔
غلام محمد صفی نے کہا کہ اپنا حق مانگنا کوئی جرم نہیں، بلکہ یہ وہ بنیادی حق ہے جو اقوام متحدہ کے چارٹر اور بین الاقوامی انسانی حقوق کے معاہدات کے تحت ہر قوم کو حاصل ہے۔ انہوں نے عالمی برادری کو متنبہ کیا کہ اقوام متحدہ اور بڑی طاقتوں کی مسلسل خاموشی نہ صرف کشمیریوں کے مصائب کو بڑھا رہی ہے بلکہ جنوبی ایشیا اور عالمی امن کے لیے بھی خطرہ بنتی جا رہی ہے۔
مسئلہ کشمیر محض ایک علاقائی تنازع نہیں بلکہ انصاف، انسانی وقار اور عالمی امن کا سوال ہے۔ دنیا کب تک خاموش تماشائی بنی رہے گی؟ بیان کے اختتام پر کل جماعتی حریت کانفرنس نے عالمی اداروں سے پرزور اپیل کی کہ وہ محصور کشمیری قائدین اور کارکنان کی رہائی کے لیے فوری اقدامات کریں اور مسئلہ کشمیر کو اقوام متحدہ کی قراردادوں اور کشمیری عوام کی امنگوں کے مطابق حل کرنے میں اپنا مؤثر کردار ادا کریں۔