راولپنڈی:پاک فوج کے سربراہ فیلڈ مارشل سید عاصم منیر کا جمہوریہ مصر کا سرکاری دورہ، دورے کا مقصد پاکستان اور مصر کے درمیان عسکری تعاون اور دفاعی اشتراک کو مزید مضبوط بنانا ہے.
آئی ایس پی آر کے مطابق دورے کے دوران فیلڈ مارشل نے مصری وزیر دفاع و دفاعی پیداوار جنرل عبدالمجید صقر اور مصری مسلح افواج کے چیف آف اسٹاف لیفٹیننٹ جنرل احمد خلیفہ فتحی سے الگ الگ ملاقاتیں کیں۔
ملاقاتوں میں باہمی دلچسپی کے امور، علاقائی سلامتی کی صورتحال اور دفاعی تعاون کے مختلف پہلوؤں پر تفصیلی تبادلہ خیال کیا گیا۔
فیلڈ مارشل سید عاصم منیر نے اس موقع پر کہا کہ مصر ایک برادر اسلامی ملک ہےاور دونوں ممالک کے درمیان دفاعی تعاون نہ صرف دونوں ملکوں کے عوام کے مفاد میں ہے بلکہ خطے میں امن و استحکام کے فروغ میں بھی مددگار ثابت ہوگا۔
وزارتِ دفاع پہنچنے پر فیلڈ مارشل سید عاصم منیر کو گارڈ آف آنر پیش کیا گیا، بعد ازاں انہوں نے گمنام سپاہیوں کی یادگار اور سابق مصری صدر محمد انور السادات کی قبر پر پھول رکھے۔
آئی ایس پی آر کے مطابق آرمی چیف نے جامعہ الازہر کے شیخِ اعظم، شیخ احمد الطیب سے بھی ملاقات کی۔ ملاقات میں امتِ مسلمہ کو درپیش چیلنجز پر تبادلہ خیال کیا گیا، شیخ الازہر نے امت کے اتحاد اور فکری رہنمائی کی ضرورت پر زور دیاجبکہ فیلڈ مارشل سید عاصم منیر نے انتہا پسندانہ نظریات اور اسلام کی مسخ شدہ تشریحات کے خاتمے کی اہمیت پر روشنی ڈالی۔