راولپنڈی:پاکستان اور جنوبی افریقا کی کرکٹ ٹیموں کے درمیان آئندہ سیریز کے لیے میچ آفیشلز کا اعلان کر دیا گیا ۔ پی سی بی سے جاری تفصیلات کے مطابق آئی سی سی ایلیٹ پینل کے رکن رنجن مدوگالے کو سیریز کا میچ ریفری مقرر کیا گیا ہے۔ دو ٹیسٹ میچوں پر مشتمل سیریز کا پہلا ٹیسٹ میچ 12 سے 16 اکتوبر تک لاہور کے قذافی سٹیڈیم میں کھیلا جائے گا جس میں راڈنی ٹکر اور کرسٹوفر براؤن آن فیلڈ امپائرز کے فرائض انجام دیں گے۔
دوسرا ٹیسٹ 20 سے 24 اکتوبر راولپنڈی کرکٹ سٹیڈیم میں ہو گا جہاں کرسٹوفر براؤن اور سائقَت شرف الدولہ امپائرنگ کریں گے۔ ٹی 20 سیریز میں بھی پاکستانی امپائرز کو ذمہ داریاں دی گئی ہیں۔ پہلے اور دوسرے ٹی 20 انٹرنیشنل میں محمد آصف یعقوب اور راشد ریاض آن فیلڈ امپائرز ہوں گے جبکہ تیسرے میچ میں راشد ریاض کے ساتھ فیصل خان آفریدی امپائرنگ کے فرائض انجام دیں گے۔
ون ڈے سیریز فیصل آباد کے اقبال سٹیڈیم میں شیڈول ہے۔ پہلے ون ڈے میں سائقَت شرف الدولہ اور آصف یعقوب امپائرنگ کریں گے، دوسرے میچ کے لیے ایلکس وارف اور احسن رضا جبکہ تیسرے ون ڈے میں سائقَت شرف الدولہ اور فیصل خان آفریدی کو آن فیلڈ امپائرز مقرر کیا گیا ہے۔