اداکارہ ہانیہ عامر نےگائیکی کے میدان میں قدم رکھ دیا: پہلا پنجابی ہپ ہاپ گانا ’پابلو‘ ریلیز

لاہور:پاکستانی شوبز انڈسٹری کی مقبول ترین اداکارہ ہانیہ عامر نے اداکاری کے بعد اب گلوکاری کی دنیا میں بھی انٹری دے دی ہے، اور اپنے فنی کیریئر کے 10 سال مکمل ہونے پر اپنا پہلا سولو گانا ’پابلو‘ ریلیز کر دیا ہے۔

پنجابی ہپ ہاپ اور ریپ کے امتزاج والے اس منفرد گانے کو ہانیہ عامر نے خود تحریر اور کمپوز کیا ہے۔ گانے کی شروعات ایک دلفریب پیانو کی دھن سے ہوتی ہے جو آگے چل کر تیز تر ہپ ہاپ بیٹس میں بدل جاتی ہے۔ اس گانے کے ذریعے ہانیہ عامر نے اپنی شخصیت، شہرت اور سوشل میڈیا پر خود پر ہونے والی تنقید کو ہدف بنایا ہے۔ گانے کے بولوں میں وہ ناقدین کو دوٹوک انداز میں جواب دیتی نظر آتی ہیں جو انہیں ’فیک‘ قرار دیتے ہیں یا ان کے رویے پر سوال اٹھاتے ہیں۔ ہانیہ نے اپنے مخصوص ’پنڈی اٹیٹیوڈ‘ کا حوالہ دیتے ہوئے واضح کیا ہے کہ وہ لوگوں کی آراء کی پروا کیے بغیر اپنی زندگی اپنی مرضی سے جینا جانتی ہیں۔
گانے کا ایک اور دلچسپ پہلو اس کا اختتام ہے، جہاں بھارتی متنازع اداکارہ راکھی ساونت کا ایک وائس نوٹ شامل کیا گیا ہے۔ اس وائس نوٹ میں راکھی ساونت نے ہانیہ عامر کی حوصلہ افزائی کرتے ہوئے انہیں تنقید سے نہ گھبرانے کا مشورہ دیا ہے، ان کی خوبصورتی کی تعریف کرتے ہوئے انہیں ’حور‘ اور ’شیرنی‘ قرار دیا ہے، اور پیغام کے آخر میں یہ مشہور جملہ کہا ہے کہ ’جو ڈر گیا، سمجھو مر گیا۔‘
واضح رہے کہ گانے کی ریلیز سے قبل ہانیہ عامر نے انسٹاگرام پر اس کی ایک جھلک شیئر کرتے ہوئے لکھا تھا، ”ہیلو اسپاٹیفائی، ہانیہ بات کر رہی ہوں۔“ جس پر اسپاٹیفائی پاکستان نے بھی باضابطہ طور پر جواب دے کر ان کے اس نئے سفر کو سراہا ہے۔ مداحوں کی جانب سے اداکارہ کے اس گانے کو بے پناہ پذیرائی بخشی جا رہی ہے۔