لاہور :ڈی جی آئی ایس پی آر لیفٹیننٹ جنرل احمد شریف چودھری نے پنجاب یونیورسٹی لاہور کا دورہ کیا، جہاں طلباء، اساتذہ اور یونیورسٹی انتظامیہ کی جانب سے ان کا پرتپاک استقبال کیا گیا۔
دورے کے دوران لیفٹیننٹ جنرل احمد شریف چوہدری نے طلبہ و طالبات کے ساتھ ایک خصوصی نشست کی، جس میں انہوں نے طلباء کے سوالات کے جوابات دیئے اور قومی سلامتی، فیک نیوز، اور ڈس انفارمیشن جیسے اہم موضوعات پر تفصیلی گفتگو کی۔
طلباء نے مادرِ وطن کے دفاع میں پاک فوج کے شانہ بشانہ کھڑے ہونے کے عزم کا اظہار کیا اور ملکی سلامتی کے لیے پاک فوج کی قربانیوں کو سراہا۔
ڈی جی آئی ایس پی آر نے وائس چانسلر پروفیسر ڈاکٹر محمد اور فیکلٹی ممبران سے بھی ملاقات کی۔ اس موقع پر طلبہ اور اساتذہ نے بھارت کے خلاف کامیاب حکمت عملی اور عسکری فتوحات پر پاک فوج کو زبردست خراج تحسین پیش کیا۔
شرکاء کا کہنا تھا کہ وطن عزیز کے دفاع کے لیے اساتذہ اور طلباء ہر وقت پاک فوج کے ساتھ کھڑے ہیں۔ انہوں نے مزید کہا کہ دشمن کی جانب سے جاری منفی پروپیگنڈے کی وجہ سے پیدا ہونے والے ابہام اور شکوک و شبہات کو اس نشست نے ختم کیا ہے۔
شرکاء نے یہ بھی کہا کہ لیفٹیننٹ جنرل احمد شریف چوہدری سے ملاقات کے دوران انہیں فیک نیوز اور ڈس انفارمیشن کے خطرات سے متعلق آگاہی ملی، جو نوجوانوں میں بڑھتی ہوئی غلط فہمیوں کے خاتمے کے لیے نہایت ضروری ہے۔ ان کا کہنا تھا کہ اس نوعیت کے سیشنز کو تعلیمی اداروں میں باقاعدگی سے منعقد کیا جانا چاہیے۔