راولپنڈی: پاک فضائیہ کے سربراہ ایئر چیف مارشل ظہیر احمد بابر سدھو سے عراقی فضائیہ کے کمانڈر لیفٹیننٹ جنرل اسٹاف پائلٹ مہند غالب محمد راضی الاسدی کی قیادت میں ایک اعلیٰ سطحی دفاعی وفد نے ایئر ہیڈکوارٹرز اسلام آباد میں ملاقات کی۔ ملاقات کے دوران دونوں برادر ممالک کے درمیان باہمی تعاون کے مختلف پہلوؤں پر تبادلہ خیال کیا گیا، جن میں مشترکہ تربیت، صلاحیت میں اضافہ اور ہوابازی کی صنعت میں پیش رفت کو خصوصی اہمیت دی گئی۔
آئی ایس پی آر کے مطابق مہمان وفد کی آمد پر پاک فضائیہ کے چاق و چوبند دستے نے لیفٹیننٹ جنرل مہند الاسدی کو گارڈ آف آنر پیش کیا۔
ملاقات میں ایئر چیف مارشل ظہیر احمد بابر سدھو نے پاکستان اور عراق کے مابین گہرے مذہبی اور تاریخی رشتوں کو اجاگر کیا، جنہیں دونوں فضائی افواج کے درمیان دیرینہ تعلقات کی بنیاد قرار دیا۔ انہوں نے عراقی فضائیہ کی تربیت کے حوالے سے مکمل تعاون کی یقین دہانی کرائی اور کہا کہ پاک فضائیہ عراقی فضائیہ کی صلاحیت بڑھانے کے اقدامات میں ہر ممکن مدد فراہم کرے گی۔
دونوں فضائیہ سربراہان نے مشترکہ مشقوں اور تربیتی پروگرامز کے انعقاد پر اتفاق کیا تاکہ دونوں افواج کے درمیان انٹرآپریبلٹی اور آپریشنل ہم آہنگی کو مزید فروغ دیا جا سکے۔
عراقی فضائیہ کے سربراہ نے پرتپاک استقبال اور مہمان نوازی پر دلی شکریہ ادا کیا اور پاک فضائیہ کی پیشہ ورانہ قیادت کو سراہتے ہوئے اسے خطے کی جدید، پیشہ ور اور ٹیکنالوجی سے آراستہ فضائی قوت قرار دیا۔ انہوں نے عراق میں فضائی تربیت کے مکمل نظام کو ازسرنو ترتیب دینے کی خواہش کا اظہار کیا اور اس ضمن میں پاک فضائیہ کے عالمی معیار کی تربیتی صلاحیتوں سے استفادہ حاصل کرنے کی درخواست کی۔
انہوں نے پی اے ایف ( PAF )کے پائلٹس کے تبادلے پر مشتمل پروگرام میں دلچسپی ظاہر کی تاکہ عراقی فضائیہ کے افسران، پاک فضائیہ کے تجربہ کار اور جنگ آزمودہ پیشہ ور افراد سے براہِ راست سیکھ سکیں.
نیشنل ایرو اسپیس سائنس اینڈ ٹیکنالوجی پارک کے دورے کے دوران انہوں نے پی اے ایف کی اختراعی سوچ، مقامی صلاحیتوں اور مستقبل بین وژن کو بے حد سراہا اور کہا کہ عراقی فضائیہ بھی اس ماڈل سے متاثر ہو کر عراق میں ایک ایسا ہی مربوط نظام قائم کرنے کی خواہش رکھتی ہے، جہاں تعلیمی، صنعتی اور عسکری ضروریات کو ایک چھت کے نیچے یکجا کیا جا سکے۔
بعد ازاں وفد نے نیشنل آئی ایس آر اور انٹیگریٹڈ ایئر آپریشنز سینٹر اور پاک فضائیہ کے سائبر کمانڈ کا دورہ بھی کیا، جہاں انہیں پی اے ایف کی آپریشنل صلاحیتوں اور ٹیکنالوجی پر مبنی اقدامات پر تفصیلی بریفنگ دی گئی۔
عراقی دفاعی وفد کا یہ دورہ دونوں ممالک کے درمیان دفاعی شراکت داری کو مزید مضبوط بنانے، باہمی تعاون کو فروغ دینے اور برادرانہ تعلقات کو مستحکم کرنے کے عزم کا مظہر ہے۔