اسلام آباد : میجر عدنان اسلم شہید کی نمازِ جنازہ راولپنڈی میں ادا کردی گئی ہے، جس میں وزیراعظم شہباز شریف، فیلڈ مارشل سید عاصم منیر اور وفاقی وزرا سمیت اعلیٰ عسکری وسیاسی قیادت نے شرکت کی۔
پاک فوج کے شعبہ تعلقات عامہ (آئی ایس پی آر) کے مطابق راولپنڈی کے چکلالہ میں میجر عدنان اسلم شہید کی نمازِ جنازہ ادا کر دی گئی۔
خیال رہے کہ 31 سالہ میجر عدنان اسلم 2 ستمبر کو بنوں میں فتنہ الخوارج کے بزدلانہ حملے میں زخمی ہوئے تھے، فتنہ الخوارج کے خلاف بہادری سے لڑنے والے 31 سالہ میجر عدنان اسلم کمبائنڈ ملٹری ہسپتال (سی ایم ایچ) راولپنڈی میں دورانِ علاج شہادت کے مرتبے پر فائز ہو گئے۔
ترجمان پاک فوج کے مطابق میجر عدنان اسلم کی نمازِ جنازہ چکلالہ، راولپنڈی میں ادا کر دی گئی، قوم کے بہادر سپوت کی نماز جنازہ میں وزیرِ اعظم شہباز شریف، فیلڈ مارشل عاصم منیر، وفاقی وزیرِ دفاع خواجہ آصف، وفاقی وزیرِ اطلاعات عطا تارڑ، حاضر سروس فوجی و سول افسران اور شہید کے اہلخانہ نے شرکت کی۔