لاہور :(حافظ نعیم سے ) وزیراعلی پنجاب مریم نواز شریف نے گجرات میں سیلابی پانی کے نکاس کے عمل میں تیزی آنے پر اظہار اطمینان کیا ہے اور کہا ہے کہ اللہ تعالیٰ کا شکر ہے کہ گجرات میں سیلابی پانی کی سطح میں تیزی سے کمی پر آ رہی ہے، فوارہ چوک کلئیر ہوچکا ہے۔
وزیراعلی مریم نواز کا کہنا تھا کہ گجرات شہر میں صورتحال تیزی سے بہتری کی طرف گامزن ہے، جلد شہری اس مشکل سے مکمل نجات پائیں گے۔صرف ایک دن میں سیلابی پانی کی سطح میں دو فٹ کمی آنا آپریشن کی کامیابی کی علامت ہےوزیراعلی مریم نواز شریف کی تمام ٹیم کو شاباش، متعلقہ صوبائی سیکرٹریز، افسران اور عملے کی کاوشوں کو خراج تحسین پیش کیا ہے۔
سیلابی پانی کا بہاؤ موڑنے کے لیے لورائی کے مقام پر کام جاری ہے جبکہ مزید بارش یا پانی کے دباؤ میں اضافے کی صورت میں لورائی کو محفوظ اور مضبوط کرنے کے لیے مناسب افرادی قوت اور سامان موجود ہے۔
واسا، محکمہ آبپاشی کے افسران اور عملہ، سی اینڈ ڈبلیو کے چیف اور ایگزیکٹو انجینئر سمیت دیگر حکام فیلڈ آپریشن میں مصروف ہیں جبکہ واسا کے 8 ایگزیکٹو انجینئرز بھی گجرات آپریشن کی نگرانی کررہے ہیں۔
رپورٹ کے مطابق ڈرون کیمروں کے ذریعے پانی کے بہاؤ میں رکاوٹ بننے والے علاقوں کی نشاندہی مکمل کرلی گئی ہے جبکہ محکمہ آبپاشی کے حکام مستقبل کی پلاننگ کے لئے ریسرچ سٹڈی پر مامور ہیں یہ عمل سروس ڈلیوری کے معیار کو بہتر بنائے گا۔
واسا کا باضابطہ ادارہ قائم ہونے سے گجرات میں صفائی ستھرائی، نکاسی آب اور سیوریج کے مسائل مستقل بنیادوں پر حل ہوں گے۔