چکوال: (بیورو چیف جلیل نقوی سے)

تلہ گنگ روڈ پر ثقافت ریسٹورنٹ کے قریب پیش آنے والے المناک ٹریفک حادثے میں جاں بحق ہونے والے نوجوان اور خاتون کی شناخت ہوگئی ہے۔ حادثے میں جاں بحق نوجوان فرحان عباس ولد نذر عباس اور خاتون ماریہ تبسم، دونوں سکنہ ڈھوک سیال تھے۔ ابتدائی اطلاعات کے مطابق موٹرسائیکل سوار گاڑی کو اوورٹیک کرتے ہوئے سامنے سے آنے والے ٹرالر سے ٹکرا گئے، جس کے نتیجے میں دونوں موقع پر ہی جاں بحق ہوگئے۔ بتایا گیا ہے کہ ماریہ تبسم گردوں کے عارضے میں مبتلا تھیں اور رات کی شفٹ میں ڈسٹرکٹ ہیڈ کوارٹرز ہسپتال چکوال سے ڈائیلاسز کروانے کے بعد اپنے کزن فرحان عباس کے ہمراہ گھر واپس جا رہی تھیں کہ مرید کے قریب یہ افسوسناک حادثہ پیش آگیا۔ اطلاع ملتے ہی ریسکیو 1122 اور تھانہ صدر پولیس کی ٹیمیں موقع پر پہنچ گئیں اور دونوں میتوں کو ڈسٹرکٹ ہیڈ کوارٹرز ہسپتال چکوال منتقل کر دیا گیا۔ دوسری جانب تلہ گنگ روڈ پر پیش آنے والے حادثے کا ڈی پی او چکوال نے سخت نوٹس لیتے ہوئے کارروائی کی ہدایت کی، جس پر تھانہ صدر پولیس نے ٹرالر قبضے میں لے کر ڈرائیور کو گرفتار کر لیا اور اس کے خلاف مقدمہ درج کر لیا۔ ترجمان چکوال پولیس کے مطابق واقعے پر قانونی کارروائی عمل میں لائی جا رہی ہے۔

