نئی دہلی : بھارت میں سوشل میڈیا اسٹار کی منگنی کی خبر سن کر بے قابو ہونے والے ایک سرپھرے مداح کو زبردستی گھر میں داخل ہو کر شادی کا مطالبہ کرنا مہنگا پڑ گیا۔ اہلِ خانہ اور محلے داروں کے مبینہ تشدد سے شدید زخمی ہونے والا نوجوان ایک ہفتے تک موت و حیات کی کشمکش میں رہنے کے بعد دم توڑ گیا، جس پر پولیس نے انفلوئنسر کے والد سمیت دو افراد کو حراست میں لے لیا ہے۔
अभिषेक भट्ट से हुई थी नेहा बिष्ट की सगाई
…..इकतरफ़ा मुहब्बत का पैगाम लेकर चेन्नई से सीधा पहुंचा DELHI… कह दिया मुझे तुमसे मुहब्बत है.. शादी करनी है। नेहा के पिता – पड़ोसियो ने इतना पीटा की जान ही चली गई।
#viralvideo #AnjliStory14 से #viralreels #NehaBisht https://t.co/TnWkpd3mRF
— TRUE STORY (@TrueStoryUP) November 20, 2026
بھارتی میڈیا رپورٹس کے مطابق انسٹاگرام پر 6 لاکھ سے زائد فالوورز رکھنے والی معروف کونٹینٹ کریئیٹر نیہا بِشت نے حال ہی میں اپنی منگنی اور جلد ہونے والی شادی کی تصاویر اور ویڈیوز شیئر کی تھیں۔ اس پیش رفت سے دلبرداشتہ ہو کر چنئی میں نجی ملازمت کرنے والا ابھینو نامی نوجوان، جس کا آبائی تعلق اتر پردیش کے ضلع غازی پور سے تھا، سیدھا مشرقی دہلی کے علاقے مدھو وہار میں نیہا کی رہائش گاہ پر جا پہنچا۔
پولیس ریکارڈ کے مطابق 7 نومبر کو پیش آنے والے اس واقعے میں ملزم مبینہ طور پر نشے کی حالت میں زبردستی گھر کے اندر داخل ہوا اور نیہا سے فوری شادی پر اصرار کرنے لگا۔ اس اچانک مداخلت اور بدتمیزی پر گھر والوں اور آس پاس کے لوگوں کا پارہ چڑھ گیا، جنہوں نے پولیس کو بلانے سے قبل نوجوان کو بدترین تشدد کا نشانہ بنایا۔
اطلاع ملنے پر جب پولیس موقع پر پہنچی تو ابھینو کمر اور ٹانگ پر گہرے زخموں کے ساتھ شدید زخمی حالت میں پڑا تھا۔ اسے فوری طور پر راجیو گاندھی اسپتال منتقل کیا گیا، تاہم وہ زخموں کی تاب نہ لاتے ہوئے 15 نومبر کو چل بسا۔
تفتیشی حکام کا کہنا ہے کہ مقتول کافی عرصے سے نیہا بِشت کی ویڈیوز دیکھتا تھا اور دل ہی دل میں انہیں چاہنے لگا تھا، جبکہ خاتون انفلوئنسر اسے بالکل نہیں جانتی تھیں۔ نوجوان کی موت کے بعد پولیس نے واقعے کا رخ موڑتے ہوئے غیر ارادی قتل کی دفعات شامل کر کے نیہا بِشت کے والد وریندر بِشت اور ایک پڑوسی کو گرفتار کر لیا ہے۔ مزید ملزمان کے تعین کے لیے علاقے میں نصب سی سی ٹی وی کیمروں کا ریکارڈ کھنگالا جا رہا ہے۔

