بلوچستان (بیوروچیف رحمت اللہ بلوچ)
بلوچستان کے ضلع نوشکی میں تاریخ کا ایک انتہائی انوکھا اور لرزہ خیز واقعہ پیش آیا ہے، جہاں کلی غریب آباد کے قبرستان سے مسلح افراد تدفین سے قبل مقتول نوجوان کی میت مبینہ طور پر زبردستی اپنے ساتھ اٹھا کر لے گئے۔ اس دوران جنازے میں شریک کم از کم تین افراد کے بھی لاپتہ ہونے کی اطلاعات موصول ہوئی ہیں۔
تفصیلات کے مطابق، واقعے کا آغاز نوشکی بازار کی گوشت مارکیٹ میں پیش آنے والے خونریز واقعے سے ہوا، جہاں دو مسلح افراد نے فائرنگ کر کے جہانزیب بڑیچ نامی نوجوان کو قتل کر دیا۔ اس موقع پر موقع پر موجود غیور شہریوں اور افراد نے دونوں حملہ آوروں کو دبوچ لیا اور چھریوں کے وار سے پہلے انہیں شدید زخمی کیا، بعد ازاں انہیں ایک دوسری گلی میں لے جا کر فائرنگ کے ذریعے ہلاک کر دیا گیا۔
دن دہاڑے پیش آنے والے اس تہرے قتل کی وجوہات اور محرکات کئی گھنٹے گزر جانے کے باوجود تاحال منظرِ عام پر نہیں آ سکی ہیں۔ صورتحال اس وقت مزید پیچیدہ اور خوفناک ہو گئی جب مقتول جہانزیب بڑیچ کی تدفین کے لیے کلی غریب آباد کے قبرستان میں جنازے کی تیاریاں جاری تھیں کہ نامعلوم مسلح افراد وہاں آن دھمکے اور مبینہ طور پر میت کو اپنے ساتھ زبردستی اٹھا کر لے گئے۔
پولیس ذرائع نے واقعے کی تصدیق کرتے ہوئے بتایا ہے کہ تاحال اس حوالے سے کسی بھی فریق کی جانب سے باقاعدہ طور پر تھانے میں کوئی رپورٹ یا ایف آئی آر درج نہیں کروائی گئی ہے، تاہم پولیس کو بھی اس نوعیت کی تمام اطلاعات موصول ہو چکی ہیں اور حالات پر نظر رکھی جا رہی ہے۔
جنازے کے دوران قبرستان سے میت کو زبردستی اٹھائے جانے اور تین افراد کے لاپتہ ہونے کا یہ اپنی نوعیت کا پہلا واقعہ ہے، جس نے علاقے میں خوف و ہراس پھیلانے کے ساتھ ساتھ امن و امان کی صورتحال پر بڑے سوالیہ نشان کھڑے کر دیے ہیں۔