ڈھڈیال: ( منور حسین نمائندہ بے نقاب نیوز )
تھانہ ٹمن کی حدود میں واقع ٹمن اڈا کے علاقے میں دو فریقین کے درمیان ہونے والے پرتشدد جھگڑے کے نتیجے میں ایک شخص جان کی بازی ہار گیا۔پولیس کے مطابق ریسکیو پکار 15 پر اطلاع موصول ہوئی کہ ٹمن اڈا پر دو گروپوں کے مابین شدید لڑائی اور جھگڑا ہوا ہے۔ واقعے کی اطلاع ملتے ہی ایس ڈی پی او تلہ گنگ سرکل اور ایس ایچ او تھانہ ٹمن فوری طور پر پولیس نفری کے ہمراہ موقع پر پہنچ گئے۔جھگڑے کے دوران شدید زخمی ہونے والے نوجوان کی شناخت اسد ولد محمد سفیر سکنہ ٹمن کے نام سے ہوئی ہے۔ پولیس اور ریسکیو اہلکاروں نے زخمی کو فوری طبی امداد کے لیے تحصیل ہیڈ کوارٹر (THQ) ہسپتال تلہ گنگ منتقل کیا، تاہم وہ گہرے زخموں کی تاب نہ لاتے ہوئے راستے میں یا ہسپتال پہنچ کر دم توڑ گیا۔
پولیس حکام کا کہنا ہے کہ واقعے کی تمام زاویوں سے تحقیقات کا آغاز کر دیا گیا ہے جبکہ ملزمان کی گرفتاری کے لیے چھاپے مارے جا رہے ہیں۔ قانون ہاتھ میں لینے والے عناصر کو جلد قانون کے کٹہرے میں لایا جائے گا۔