خوشاب (راجہ نورالٰہی عاطف سے)
گورنمنٹ گریجویٹ کالج برائے خواتین خوشاب کی ہونہار طالبہ حلیمہ سعدیہ نے ایک مرتبہ پھر اپنی صلاحیتوں کا لوہا منواتے ہوئے صوبائی سطح پر انسدادِ بدعنوانی کے موضوع پر منعقدہ اردو تقریری مقابلے میں دوسری پوزیشن حاصل کر کے ادارے کا نام روشن کر دیا۔بی ایس انگلش کی طالبہ حلیمہ سعدیہ نے اپنی شاندار تقریری صلاحیتوں، پُراعتماد اندازِ بیان، فصاحت و بلاغت اور بہترین اظہارِ خیال کے ذریعے صوبائی سطح پر نمایاں کامیابی حاصل کی۔ ان کی اس کامیابی کو ان کی مسلسل محنت، لگن، خود اعتمادی اور غیر معمولی صلاحیتوں کا مظہر قرار دیا جا رہا ہے۔ عوامی، سماجی، تعلیمی ،ادبی اور صحافتی حلقوں نے پرنسپل ادارہ ہذا حفصہ حبیب کو ان کے ادارے کی ہونہار طالبہ حلیمہ سعدیہ کی اس نمایاں کامیابی پر مبارکباد پیش کرتے ہوءے ادارے کی مزید شاندار کامیابیوں کے لیے نیک خواہشات کا اظہار کیا ہے۔ ان کا کہنا ہے کہ یہ اعزاز نہ صرف طالبہ کے لیے بلکہ پورے ادارے کے لیے باعثِ فخر ہے اور اس سے دیگر طالبات کو بھی تعلیمی، ادبی اور ہم نصابی سرگرمیوں میں آگے بڑھنے کا حوصلہ ملے گا۔
دریں اثناء کالج کی انتظامیہ نے اس عزم کا اظہار کیا کہ ادارے میں طالبات کی پوشیدہ صلاحیتوں کو اجاگر کرنے اور انہیں صوبائی و قومی سطح پر اپنی قابلیت منوانے کے مواقع فراہم کرنے کا سلسلہ جاری رکھا جائے گا۔