لاہور: برکت مارکیٹ میں شہری سے کھانے کے پیسے مانگنا مہنگا پڑ گیا، پولیس اہلکاروں کے خلاف بھیک مانگنے کا مقدمہ درج

لاہور:لاہور کے علاقے گارڈن ٹاؤن میں برکت مارکیٹ میں ڈیوٹی کے دوران شہری سے کھانے کے نام پر پیسے مانگنا پولیس اہلکاروں کو مہنگا پڑ گیا۔ پولیس حکام نے تادیبی و قانونی کارروائی کرتے ہوئے تینوں اہلکاروں کے خلاف بھیک مانگنے کے الزام میں مقدمہ درج کر کےانہیں گرفتار اور حوالات منتقل کر دیا ہے۔
ترجمان ڈی آئی جی آپریشنز کے مطابق ملزمان میں پولیس اہلکار فیاض، فرحان اور احمد مصطفیٰ شامل ہیں۔ یہ واقعہ برکت مارکیٹ کے قریب پیش آیا جہاں ڈیوٹی پر مامور پولیس اہلکاروں نے ایک شہری کو روکا اور اس سے کھانے کی غرض سے پیسوں کا مطالبہ کیا۔

معاملے کی اطلاع ملتے ہی اعلیٰ حکام نے واقعہ کا سخت نوٹس لیا، جس پر ملزمان کے خلاف پنجاب کے اینٹی بیگری (انسدادِ گداگری) قانون اور پولیس قواعد کی ضوابط کی خلاف ورزی کے تحت کارروائی عمل میں لائی گئی۔
ڈی آئی جی آپریشنز لاہور کا کہنا ہے کہ فورس کا شعبہ احتساب فعال ہے اور ڈیوٹی میں غفلت، بدعنوانی، یا نامناسب رویہ اختیار کرنے والے اہلکاروں کے خلاف زیرو ٹالرینس پالیسی پر عمل پیرا رہا جائے گا۔ شہریوں کے ساتھ بدسلوکی یا محکمہ پولیس کے وقار کو مجروح کرنے والی کسی سرگرمی کو برداشت نہیں کیا جائے گا۔