ڈیمو کریٹس واضح اکثریت کے باوجود صدر ٹرمپ کی تجارتی پالیسیوں پر عملدرآمد پر مجبور

واشنگٹن ڈی سی :امریکی کانگریس میں ڈیموکریٹس کی واضح اکثریت حاصل کرنے کے بعد صدر ڈونلڈ ٹرمپ کی تجارتی پالیسیوں اور درآمدی ٹیرف پر کڑی نگرانی اور تنقید کا امکان بڑھ گیا ہے، تاہم ماہرین کے مطابق ڈیموکریٹس کے لیے ان پالیسیوں کو فوری طور پر ختم کرنا آسان نہیں ہوگا۔
خبر رساں ادارے رائٹرز کے مطابق ایوان نمائندگان اور سینیٹ میں کامیابی کے بعد ڈیموکریٹس کو حکومتی اداروں کی فنڈنگ سے متعلق اختیارات استعمال کرتے ہوئے ٹرمپ سے تجارتی اور دیگر معاملات پر رعایتیں حاصل کرنے کا موقع مل سکتا ہے۔ تاہم تجارتی ماہرین کا کہنا ہے کہ انتخابی نتائج سے صدر کی ٹیرف پالیسی میں فوری تبدیلی کی توقع نہیں رکھنی چاہیے۔
ارنسٹ اینڈ ینگ کے تجارتی پالیسی کے منیجنگ ڈائریکٹر بلیک ہارڈن کے مطابق کانگریس میں تبدیلی سے صدر کے تجارتی ایجنڈے اور نافذ ٹیرف پر نمایاں اثر پڑنے کا امکان نہیں، کیونکہ تجارتی اختیارات کا بڑا حصہ انتظامیہ کو حاصل ہے۔
ماہرین کے مطابق ڈیموکریٹس کی توجہ تجارتی کمیٹیوں کے ذریعے تحقیقات، سماعتوں اور حکومتی پالیسیوں کی نگرانی پر مرکوز رہے گی۔ ڈیموکریٹس ٹرمپ کی جانب سے استعمال کیے گئے بعض پرانے تجارتی قوانین کو ختم کرنے کی بھی کوشش کرسکتے ہیں۔
تاہم صدر کے ویٹو کو ختم کرنے کے لیے سینیٹ میں 67 اور ایوان نمائندگان میں 290 ووٹ درکار ہوں گے، جس کے حصول کے لیے ریپبلکن ارکان کی حمایت بھی ضروری ہوگی۔
ڈیموکریٹ رہنما رچرڈ نیل نے کہا کہ ان کی جماعت مہنگائی اور عوامی اخراجات میں کمی، صحت کے نظام میں بہتری اور عام شہریوں کو ریلیف دینے کے لیے اقدامات کرے گی۔ ان کے مطابق ایران کے ساتھ جنگ اور ٹیرف کے باعث امریکی عوام کو اضافی اخراجات کا سامنا ہے۔
دوسری جانب ماہرین کا کہنا ہے کہ ٹرمپ انتخابی نتائج کے باوجود نئے ٹیرف عائد کرنے کی کوشش جاری رکھیں گے۔ چین، بھارت اور ویتنام سمیت متعدد ممالک کی تجارتی پالیسیوں کی تحقیقات کے نتیجے میں مزید محصولات عائد کیے جاسکتے ہیں۔