پنجاب حکومت پر کرپشن کے الزامات اور گجرات میں ڈپٹی کمشنر کی تبدیلی کے تنازع پر مسلم لیگ (ن) اور پنجاب حکومت کی جانب سے وفاقی وزیر چوہدری سالک حسین کو شدید تنقید کا نشانہ بناتے ہوئے ان سے معافی یا استعفے کا مطالبہ کر دیا گیا ہے۔
سینئر وزیر پنجاب مریم اورنگزیب نے سماجی رابطے کی سائٹ ایکس پر اپنی پوسٹ میں کہا ہے کہ چوہدری سالک حسین نے خود اعتراف کیا ہے کہ ان کے پاس پنجاب حکومت پر لگائے گئے کرپشن کے الزامات کا کوئی ثبوت موجود نہیں ہے۔ اس اعتراف پر ردعمل دیتے ہوئے مریم اورنگزیب کا کہنا تھا کہ شرافت، انصاف اور سیاسی اصولوں کا بنیادی تقاضا یہی ہے کہ ثبوت نہ ہونے اور بے بنیاد الزامات عائد کرنے پر عوام اور حکومت سے معافی مانگی جائے، نہ کہ ایک ڈی سی کے تبادلے کے انتظامی معاملے کو اپنی انا کا مسئلہ بنا لیا جائے۔
چوہدری سالک حسین خود اعتراف کر رہے ہیں کہ ان کے پاس پنجاب حکومت میں کرپشن سے متعلق لگائے اپنے الزام کے حق میں کوئی ثبوت نہیں جس کے بعد شرافت، انصاف اور اصول کا تقاضا تو یہ ہے کہ ثبوت نہ ہونے اور بے بنیاد الزامات لگانے پر معافی مانگی جائے نہ کہ ایک ڈی سی کے تبدیلی کو اپنی انا کا مسئلہ بنا لیا جائے۔ وفاق اور پنجاب میں وزیر ہونے کی حیثیت سے معاشرے سے کرپشن کے خاتمے اور گڈ گورننس کے لیے بیان بازی کے بجائے اپنی زمہ داریاں ادا کریں یا وزارتیں چھوڑ دیں۔ اڑھائی سال میں پاکستان میں محنت و شفافیت سے عوام کی خدمت کی مثال قائم کرنے والی وزیراعلی کے خلاف جھوٹے بے بنیاد الزامات برداشت نہیں کریں گے۔کرپشن دنیا کے ہر معاشرے کی بیماری ہے۔ فرق صرف یہ ہے کہ پنجاب وہ واحد صوبہ ہے جہاں وزیراعلی خود کرپشن کے خاتمے کی مہم کو لیڈ کر رہی ہیں۔
— Marriyum Aurangzeb (@Marriyum_A) November 4, 2026
حکومتی ردعمل میں مزید کہا گیا کہ چوہدری سالک حسین وفاق اور پنجاب میں اقتدار اور وزارتوں کا حصہ ہیں۔ اگر وہ معاشرے سے کرپشن کے خاتمے اور گڈ گورننس کے لیے سنجیدہ ہیں تو صرف بیان بازی کے بجائے اپنی آئینی و انتظامی ذمہ داریاں ادا کریں، بصورتِ دیگر اخلاقی طور پر وزارتیں چھوڑ دیں۔
صوبائی وزیر نے واضح کیا کہ اڑھائی سال سے پاکستان میں محنت، شفافیت اور عوامی خدمت کی نئی مثال قائم کرنے والی وزیراعلیٰ کے خلاف جھوٹے اور من گھڑت الزامات کسی صورت برداشت نہیں کیے جائیں گے۔ کرپشن اگرچہ دنیا کے ہر معاشرے کی بیماری ہے، لیکن پنجاب واحد صوبہ ہے جہاں وزیراعلیٰ خود آگے بڑھ کر کرپشن کے خاتمے کی مہم کی قیادت کر رہی ہیں۔