سکھر (رپورٹ: عبد الرحمان راجپوت)
چیف انجینئر سیپکو اعجاز احمد چنہ کی خصوصی ہدایات پر سکھر سرکل میں بجلی صارفین کے مسائل کے حل کے لیے اقدامات کا سلسلہ جاری ہے۔ اسی سلسلے میں اسسٹنٹ کمشنر (اے سی) سکھر عبدالحق سیال اور ایکسئین سکھر خلیل احمد چانڈیو کی سربراہی میں سب ڈویژن بندر روڈ کے تحت آنے والے علاقے نواں گوٹھ کا تفصیلی دورہ کیا گیا۔
دورے کے دوران ایس ڈی او سب ڈویژن بندر روڈ اسرار احمد باجکانی سمیت خادم کٹپر، منور زمان صدیقی اور برکت علی مہر بھی افسران کے ہمراہ تھے۔ اس موقع پر نواں گوٹھ یونین کونسل کے چیئرمین محمد ذاکر بندھانی، سعید بندھانی، حنیف بندھانی، فہیم بندھانی، شاکر بندھانی اور علاقے کے معززین کی کثیر تعداد بھی موجود تھی۔
وفد نے نواں گوٹھ کے مکینوں سے ملاقات کی اور یقین دلایا کہ علاقے کے دیرینہ بجلی کے مسائل کو ترجیحی بنیادوں پر حل کیا جائے گا اور جلد بجلی کی بحالی کا کام شروع کر دیا جائے گا۔ انتظامیہ نے عوام سے اپیل کی کہ وہ اس عمل میں بھرپور تعاون کریں تاکہ بجلی کی بحالی کا کام جلد مکمل ہو سکے۔
یوسی چیئرمین محمد ذاکر بندھانی نے اس موقع پر گفتگو کرتے ہوئے کہا کہ اے سی سکھر اور ایکسئین سکھر کے ساتھ تفصیلی اور مثبت بات چیت ہوئی ہے۔ انہوں نے یقین دلایا کہ عوام پر عائد غیر ضروری ڈیڈکشن کو ختم کرایا جائے گا اور ریسکیو رنگ کا کام بھی جلد شروع ہوگا۔ ہماری بھرپور کوشش ہے کہ نواں گوٹھ کے باسیوں کو جلد از جلد بجلی کی سہولت فراہم کی جائے۔
مکینوں نے سیپکو افسران، ضلعی انتظامیہ اور چیئرمین ذاکر بندھانی کے اس خوش آئند اقدام کو بھرپور انداز میں سراہا ہے۔