سرگودھا (راجہ نورالہی عاطف سے)
ڈائریکٹر جنرل اینٹی کرپشن پنجاب سہیل ظفر چٹھہ نے محمد طاہر امین کو ریجنل ڈائریکٹر اینٹی کرپشن سرگودھا تعینات کر دیا ہے، جنہوں نے اپنے عہدے کا باقاعدہ چارج سنبھال کر ذمہ داریاں انجام دینا شروع کر دی ہیں۔
چارج سنبھالنے کے بعد ریجنل ڈائریکٹر محمد طاہر امین نے ریجنل ڈائریکٹوریٹ اینٹی کرپشن سرگودھا کے افسران کے ساتھ تعارفی میٹنگ کی۔ اس موقع پر انہوں نے افسران سے خطاب کرتے ہوئے کہا کہ بدعنوانی کے خاتمے اور سرکاری اداروں میں شفافیت کے فروغ کے لیے مؤثر اقدامات کرنا اولین ترجیح ہے۔
انہوں نے واضح کیا کہ حکومت پنجاب کی زیرو ٹالرنس پالیسی اور ڈائریکٹر جنرل اینٹی کرپشن پنجاب کی ہدایات کی روشنی میں کرپٹ عناصر کے خلاف بلاامتیاز کاروائیاں جاری رکھی جائیں گی۔ کسی بھی شخص کو بدعنوانی، اختیارات کے ناجائز استعمال یا عوامی حقوق کی پامالی کی اجازت نہیں دی جائے گی۔
محمد طاہر امین، ریجنل ڈائریکٹر،نے افسران پر زور دیا کہ وہ میرٹ، شفافیت، دیانت داری اور پیشہ ورانہ ذمہ داریوں کو ملحوظ خاطر رکھتے ہوئے عوامی شکایات کا فوری ازالہ یقینی بنائیں اور بدعنوانی کے خاتمے کے لیے اپنی تمام تر صلاحیتیں بروئے کار لائیں۔
انہوں نے اس عزم کا اظہار کیا کہ اینٹی کرپشن سرگودھا ریجن میں کرپٹ عناصر کے خلاف بلا امتیاز کاروائیاں جاری رکھیں گے۔ اور عوام کو کرپشن سے پاک معاشرے کی فراہمی کے لیے بھرپور اقدامات کیے جائیں گے۔