کیپ ٹاؤن:
آسٹریلیا اور جنوبی افریقا کے درمیان نیولینڈز کرکٹ گراؤنڈ میں کھیلے جا رہے تین میچوں کی فیصلہ کن سیریز کے تیسرے اور آخری ٹیسٹ میچ میں جنوبی افریقا نے شاندار کم بیک کرتے ہوئے میچ کو انتہائی سنسنی خیز موڑ پر لا کھڑا کیا ہے۔ آسٹریلیا کو یہ ٹیسٹ اور سیریز جیتنے کے لیے چوتھی اننگز میں 288 رنز کا ہدف درکار ہے۔میچ کے آغاز میں جنوبی افریقا نے پہلی اننگز میں 329 رنز اسکور کیے۔ میزبان ٹیم کی جانب سے رین رکیلٹن نے شاندار اور ذمہ دارانہ بلے بازی کا مظاہرہ کرتے ہوئے سنچری اسکور کی اور 101 رنز بنائے۔ اس کے علاوہ ایڈن مارکرم نے 78 اور ڈیوڈ بیڈنگھم نے 50 رنز کی اننگز کھیلی۔ آسٹریلیا کی طرف سے مچل اسٹارک نے تباہ کن بولنگ کا مظاہرہ کرتے ہوئے 6 وکٹیں حاصل کیں۔جواب میں آسٹریلیا نے پہلی اننگز میں شاندار بیٹنگ کرتے ہوئے 429 رنز کا پہاڑ جیسا اسکور کھڑا کیا اور 100 رنز کی اہم برتری حاصل کی۔ آسٹریلوی اننگز کی نمایاں بات جوش انگلیس کی شاندار سنچری تھی جنھوں نے 102 رنز کی باری کھیلی۔ دیگر بلے بازوں میں ایلیکس کیری نے 80، میٹ رینشا نے 74 اور کیمرون گرین نے 65 رنز بنائے۔ جنوبی افریقا کی جانب سے سائمن ہارمر نے 4 اور مارکو جینسن نے 3 کھلاڑیوں کو آؤٹ کیا۔
پہلی اننگز میں خسارے کے بعد جنوبی افریقا نے دوسری اننگز میں زبردست کم بیک کیا اور شاندار بلے بازی کا مظاہرہ کیا۔ پروٹیز کی جانب سے ویان ملڈر
اور رِین رکیلٹن نے شاندار سنچریاں اسکور کرتے ہوئے آسٹریلوی بولرز کی ایک نہ چلنے دی۔
جنوبی افریقا کی پوری ٹیم دوسری اننگز میں 387 رنز پر آؤٹ ہوئی، جس کے ساتھ ہی آسٹریلیا کو میچ جیتنے کے لیے 288 رنز کا ہدف ملا ہے۔چوتھے دن کے اختتام تک کھیل کے اعصاب شکن مرحلے پر میچ انتہائی دلچسپ صورتحال اختیار کر چکا ہے اور آخری دن کا کھیل فیصلہ کرے گا کہ ٹیسٹ اور سیریز کا تاج کس کے سر سجتا ہے۔