فلپائن:ویب ڈیسک
فلپائن کی فضائیہ (ایئر فورس) کے لیے یہ دن تاریخ کا سیاہ ترین دن بن گیا، جہاں دو تربیتی طیارے معمول کی پرواز کے دوران فضا میں خوفناک تصادم کا شکار ہو کر زمین بوس ہو گئے۔ اس ہولناک حادثے کے نتیجے میں دونوں طیاروں میں سوار چاروں نڈر پائلٹ موقع پر ہی جاں بحق ہو گئے۔عینی شاہدین اور ابتدائی رپورٹس کے مطابق تصادم اتنا شدید تھا کہ دھماکے کی آواز دور دور تک سنی گئی اور طیاروں کے ملبے کے جلتے ہوئے ٹکڑے فضا سے زمین پر آ گرے۔ حادثے کی اطلاع ملتے ہی امدادی ٹیمیں اور سکیورٹی فورسز فوری طور پر جائے وقوعہ پر پہنچ گئیں اور علاقے کو گھیرے میں لے لیا۔فلپائن ایئر فورس کے حکام نے حادثے کی تصدیق کرتے ہوئے بتایا ہے کہ گرنے والے دونوں طیارے تربیتی مشن پر مامور تھے۔ عسکری حکام نے واقعے کی وجوہات جاننے کے لیے فوری طور پر ایک اعلیٰ سطحی انکوائری کمیٹی تشکیل دے دی ہے تاکہ یہ معلوم کیا جا سکے کہ فضا میں یہ ٹکر کیسے پیش آئی۔ اس دلخراش واقعے پر عسکری حلقوں اور ملک بھر میں شدید رنج و غم کی لہر دوڑ گئی ہے۔