سانگھڑ (اشفاق سلہری)
شہدادپور کے نواحی گاؤں مہراب شاہی میں نامعلوم مسلح ملزمان نے فائرنگ کرکے تین روز قبل ہی پسند کی شادی کرنے والے جوڑے کو موت کے گھاٹ اتار دیا۔ سفاکانہ واقعے کے بعد علاقے میں شدید خوف و ہراس پھیل گیا ہے۔پولیس کے مطابق جاں بحق ہونے والوں کی شناخت ذکیہ بلیدی اور نثار لاشاری کے ناموں سے ہوئی ہے، جنہوں نے محض تین روز قبل ہی نوابشاہ کی عدالت میں اپنی مرضی سے شادی کی تھی۔ڈی ایس پی حق نواز نے واقعے کی تفصیلات بتاتے ہوئے کہا کہ موٹر سائیکل پر سوار دو مسلح ملزمان نے گوٹھ مہراب شاہی میں دونوں کو تاک کر نشانہ بنایا، جس کے نتیجے میں دونوں میاں بیوی موقع پر ہی جاں بحق ہوگئے۔ اطلاع ملتے ہی پولیس نے فوری طور پر موقع پر پہنچ کر لاشیں اپنی تحویل میں لیں اور اسپتال منتقل کردیں۔پولیس حکام کا کہنا ہے کہ ابتدائی تحقیقات کے مطابق یہ دلخراش واقعہ "غیرت کے نام پر دہرے قتل” کا شاسانہ معلوم ہوتا ہے۔ پولیس نے واقعے کی تمام زاویوں سے تفتیش شروع کردی ہے جبکہ ملوث ملزمان کی گرفتاری کے لیے چھاپے مارے جا رہے ہیں اور جلد انہیں قانون کے کٹہرے میں لایا جائے گا۔