نئی دہلی: بھارتی لوک سبھا میں قائد حزب اختلاف راہل گاندھی نے دہلی کے علاقے بیلا اسٹیٹ کے دورے کے بعد الیکشن کمیشن آف انڈیا (ECI) اور مقامی انتظامیہ کو شدید تنقید کا نشانہ بنایا ہے۔ انہوں نے ‘اسپیشل انٹینسیو ریویژن’ (SIR) کے تحت ووٹر لسٹ سے شہریوں کے نام بڑے پیمانے پر خارج کرنے کو "ووٹ چوری کا منظم طریقہ” قرار دیا ہے۔
راہل گاندھی کے مطابق بیلا اسٹیٹ کے کل 728 رجسٹرڈ ووٹروں میں سے SIR کے بعد 727 ووٹروں کے نام انتخابی فہرست سے نکال دیے گئے اور لسٹ میں صرف 1 ووٹر کا نام باقی بچا ہے
راہل گاندھی نے سب ڈویژنل مجسٹریٹ (SDM) سے گفتگو کا حوالہ دیتے ہوئے کہا کہ پکا گھر ہونا یا نہ ہونا ووٹ کے بنیادی حق پر اثر انداز نہیں ہوتا۔ خود چیف الیکشن کمشنر گیانیش کمار کا کہنا ہے کہ بے گھر اور عارضی رہائش رکھنے والے افراد کے لیے ‘ہاؤس نمبر 0’ مختص ہے، اس کے باوجود 727 افراد کو انتخابی عمل سے باہر کر دیا گیا۔