لاہور:پاکستان کے معروف ترین یوٹیوبر سعد الرحمان (ڈکی بھائی) اور ان کی اہلیہ عروب جتوئی ایک بار پھر سوشل میڈیا پر شدید تنقید کی زد میں آ گئے ہیں۔ اس بار تنازع کی وجہ عروب جتوئی کا ایک منی وی لاگ ہے جس میں انہوں نے محض ایک ہی دن میں ایک کروڑ روپے خرچ کرنے کا انوکھا اور مہنگا ترین چیلنج مکمل کیا۔ ویڈیو سامنے آتے ہی جہاں مداحوں نے اس پر دلچسپی کا اظہار کیا، وہیں دوسری جانب سوشل میڈیا صارفین نے دولت کی عریاں نمائش کرنے پر اس جوڑے کو شدید آڑے ہاتھوں لے لیا۔
وائرل ہونے والی اس ویڈیو میں دیکھا جا سکتا ہے کہ عروب جتوئی نے ایک کروڑ روپے کا بجٹ ایک دن میں ختم کرنے کے لیے پرتعیش کھانوں سے شروعات کی، جن کا بل پچاس ہزار روپے آیا۔ اس کے بعد نیا آئی فون خریدنے پر تقریباً 10 لاکھ روپے خرچ کیے گئے، جبکہ چیلنج کے آخری اور بڑے مرحلے میں انہوں نے سونے کے زیورات اور چوڑیوں کی خریداری پر ایک بڑی رقم صرف کی کیونکہ ان کے مطابق سونا بہترین سرمایہ کاری ہے۔ عروب کا یہ بھی کہنا تھا کہ انہیں شاپنگ پر ڈسکاؤنٹ کے علاوہ جیولرز کی جانب سے سونے کا ایک سیٹ تحفے میں بھی ملا۔
جیسے ہی یہ ویڈیو انٹرنیٹ پر آئی، صارفین نے اس پر ملے جلے لیکن زیادہ تر سخت تبصرے شروع کر دیے:
دولت کی نمائش پر تنقید: ایک طبقے کا کہنا تھا کہ ایسے دور میں جب عام عوام مہنگائی اور بنیادی ضروریات کے حصول کے لیے ترس رہی ہے، ایک کروڑ روپے کی دھڑلے سے شاپنگ اور اس کی نمائش کرنا انتہائی غیر حساس رویہ ہے۔
سوشل میڈیا تبصرے: کئی صارفین نے حالیہ تنازعات کا حوالہ دیتے ہوئے کہا کہ اتنی بڑی رقم کی نمائش لوگوں میں احساسِ محرومی کو بڑھاتی ہے۔ تاہم دوسری طرف کچھ مداحوں کا یہ بھی مؤقف تھا کہ یہ جوڑے کی اپنی محنت کی کمائی ہے، اور اگر وہ اسے خرچ کر رہے ہیں یا ویڈیوز بنا رہے ہیں تو ناظرین کو اسے محض تفریح کی حد تک لینا چاہیے۔
ڈکی بھائی اور عروب جتوئی کی یہ ویڈیو اگرچہ سوشل میڈیا پر لاکھوں ویوز حاصل کر چکی ہے، لیکن یہ ایک بار پھر اس بحث کو تازہ کر گئی ہے کہ کیا ڈیجیٹل کریئیٹرز کو اپنی دولت کی اس حد تک نمائش کرنی چاہیے یا نہیں۔