مظاہرین نے مقبوضہ کشمیر میں انسانی حقوق کی خلاف ورزیوں کی مذمت کرتے ہوئے عالمی برادری سے فوری مداخلت کا مطالبہ کر دیا۔
نیویارک (ویب ڈیسک): اقوام متحدہ کی جنرل اسمبلی کے اجلاس کے موقع پر بھارتی وزیر خارجہ ایس جے شنکر کے خطاب کے دوران نیویارک میں یو این ہیڈکوارٹرز کے باہر کشمیری اور کشمیری امریکی کمیونٹی نے زبردست احتجاجی مظاہرہ کیا۔
مظاہرین نے ہاتھوں میں پلے کارڈز اور بینرز اٹھا رکھے تھے جن پر بھارت کے غاصبانہ قبضے کے خلاف اور آزادی کے حق میں نعرے درج تھے۔ مظاہرے کے دوران شرکا نے عالمی برادری اور اقوام متحدہ سے مطالبہ کیا کہ مقبوضہ جموں و کشمیر کے عوام کو ان کا بنیادی حق، حقِ خودارادیت دیا جائے اور اقوام متحدہ کی سلامتی کونسل کی منظور شدہ قراردادوں پر روح کے مطابق عمل درآمد یقینی بنایا جائے۔
مظاہرین نے گفتگو کرتے ہوئے کہا کہ بھارتی حکومت مقبوضہ وادی میں انسانی حقوق کی سنگین خلاف ورزیوں، آبادیاتی تناسب کی تبدیلی اور شہریوں پر مظالم میں ملوث ہے، جسے عالمی فورمز پر بے نقاب کرنا وقت کی اہم ضرورت ہے۔
احتجاج کے اختتام پر مظاہرین کے وفد نے اقوام متحدہ کے حکام کو ایک باضابطہ یادداشت (Memorandum) بھی پیش کی، جس میں مسئلہ کشمیر کے پرامن، منصفانہ اور پائیدار حل کے لیے اقوام متحدہ سے فوری سفارتی کردار ادا کرنے کی اپیل کی گئی۔