صوابی (حق نواز خان)
پیپلز ایکشن گروپ فار ایجوکیشن صوابی کے زیر اہتمام مردان بورڈ کے سالانہ امتحانات 2026 میں ضلع صوابی کے ٹاپ ٹین پوزیشن ہولڈر طلباء و طالبات کے اعزاز میں ایک پروقار تقریب تقسیم انعامات گورنمنٹ ہائیر سیکنڈری سکول ٹوپی میں منعقد ہوئی۔
تقریب کی مہمان خصوصی ایڈیشنل اسسٹنٹ کمشنر ٹوپی محترمہ یمین ثناء تھیں جبکہ ڈپٹی ڈسٹرکٹ ایجوکیشن آفیسر محمد آصف نے بھی خصوصی شرکت کی۔ تقریب میں ضلع بھر کے سرکاری و نجی تعلیمی اداروں کے طلباء و طالبات، والدین، اساتذہ کرام، سول سوسائٹی اور میڈیا کے نمائندگان نے کثیر تعداد میں شرکت کی۔
تقریب کا مقصد نمایاں کارکردگی دکھانے والے طلباء کی حوصلہ افزائی اور دیگر طلباء میں تعلیمی مقابلے کا جذبہ اجاگر کرنا تھا۔ اس موقع پر ٹاپ ٹین پوزیشن حاصل کرنے والے طلباء و طالبات میں اعزازی شیلڈز اور تعریفی اسناد تقسیم کی گئیں۔
مقررین نے خطاب کرتے ہوئے کہا کہ طلباء قوم کا قیمتی سرمایہ اور روشن مستقبل کی ضمانت ہیں، ان کی حوصلہ افزائی سے نہ صرف ان کے اعتماد میں اضافہ ہوتا ہے بلکہ دیگر طلباء بھی محنت کی جانب راغب ہوتے ہیں۔ مقررین نے طلباء کی کامیابی میں والدین اور اساتذہ کے کلیدی کردار کو بھی سراہا۔
مہمانان خصوصی نے پیپلز ایکشن گروپ فار ایجوکیشن کی تعلیم دوست کاوشوں کو سراہتے ہوئے کہا کہ نوجوان نسل کی رہنمائی اور تعلیم کے فروغ کے لیے معاشرے کے تمام طبقات کو اپنا کردار ادا کرنا ہوگا۔
تقریب کے اختتام پر منتظمین نے تمام مہمانوں، والدین، اساتذہ اور طلباء کا شکریہ ادا کیا۔