عمرکوٹ سول ہسپتال کی ایمرجنسی میں بنیادی طبی سہولیات کا فقدان، شہری تشویش میں مبتلا

عمرکوٹ (ڈاکٹر ایم لال واگھانی – بیورو چیف)

عمرکوٹ سول ہسپتال کی ایمرجنسی میں رات کے وقت بنیادی ادویات اور طبی سامان کی عدم دستیابی پر شہریوں نے شدید تشویش کا اظہار کیا ہے۔ شہریوں نے مطالبہ کیا ہے کہ ہنگامی صورتحال میں مریضوں کو فوری طبی امداد فراہم کرنے کے لیے تمام ضروری ادویات اور طبی سامان ایمرجنسی میں 24 گھنٹے موجود ہونا چاہیے۔

ایک شہری نے بتایا کہ رات تقریباً ساڑھے بارہ بجے ایک شخص اچانک بے ہوش ہو گیا جسے فوری طور پر سول ہسپتال کی ایمرجنسی لایا گیا۔ ڈیوٹی ڈاکٹر نے معائنے کے بعد ایک اضطراری انجیکشن فوراً لانے کی ہدایت کی۔ شہری کے مطابق ہسپتال کے مرکزی دروازے کے سامنے موجود میڈیکل اسٹور رات کے وقت بند تھا، جبکہ قریب واقع پرائیویٹ ہسپتال سے بھی مطلوبہ انجیکشن نہ مل سکا، جس کے بعد کافی جدوجہد کے بعد شہر سے انجیکشن خرید کر ہسپتال پہنچایا گیا۔

انہوں نے مزید بتایا کہ بعد میں معلوم ہوا کہ پرچی پر کینولا بھی لکھا ہوا تھا جو ہسپتال میں موجود نہیں تھا، جس سے یہ سنگین سوال اٹھتا ہے کہ کیا ضلعی ہسپتال کی ایمرجنسی میں کینولا جیسی معمولی اور بنیادی طبی اشیاء بھی دستیاب نہیں ہیں؟

شہریوں کا کہنا ہے کہ یہ مسئلہ کسی فردِ واحد کو موردِ الزام ٹھہرانے کا نہیں بلکہ پورے نظام کی کارکردگی پر سوالیہ نشان ہے۔ حادثات یا ہنگامی حالات میں مریض کے لواحقین کو ادویات اور ضروری سامان کی تلاش میں باہر نہ بھٹکنا پڑے۔ شہریوں نے محکمہ صحت، ضلعی انتظامیہ اور اعلیٰ حکام سے مطالبہ کیا ہے کہ عمرکوٹ سول ہسپتال کی ایمرجنسی کا فوراً جائزہ لیا جائے اور تمام بنیادی ادویات، انجیکشنز اور کینولا کی بلا تعطل 24 گھنٹے دستیابی یقینی بنائی جائے۔