عمرکوٹ (ڈاکٹر ایم لال واگھانی – بیورو چیف)
تعلقہ ہسپتال کنری میں طبی عملے کے غائب رہنے اور ان کی جگہ ناتجربہ کار و غیر متعلقہ افراد کے علاج کرنے کا انکشاف ہوا ہے۔ ذرائع کے مطابق ہسپتال کا اصل عملہ، بشمول اسٹاف نرسیں، ڈیوٹی سے غیر حاضر رہ کر گھر بیٹھے تنخواہیں وصول کر رہا ہے، جبکہ حکام نے اس صورتحال پر مکمل خاموشی اختیار کر رکھی ہے۔
میڈیا ٹیم کے اچانک دورے کے دوران حاصل ہونے والی فوٹیج میں دیکھا جا سکتا ہے کہ ایک غیر متعلقہ اور ناتجربہ کار نوجوان بچی کا علاج کرنے اور اسے ٹیکہ لگانے میں مصروف تھا۔ آن کیمرہ سوال کرنے پر اس نے اعتراف کیا کہ وہ پرائیویٹ طور پر کام سیکھنے آیا ہے۔ جب اس سے پوچھا گیا کہ غلط علاج سے کسی مریض کے جانی نقصان کا ذمہ دار کون ہوگا، تو اس نے حیران کن جواب دیا کہ اس کے ذمہ دار میڈیکل سپرنٹنڈنٹ (ایم ایس) اور وہ خود ہوں گے۔
سوالات کے بعد موقع پر موجود دیگر غیر متعلقہ افراد وہاں سے فرار ہو گئے۔ ضلع عمرکوٹ کے سرکاری ہسپتالوں میں علاج معالجے کی ناقص سہولیات اور لاپرواہی کی وجہ سے غریب مریضوں کی جانیں خطرے میں پڑ چکی ہیں، تاہم اعلیٰ حکام اس ابتر صورتحال پر نظریں چرائے ہوئے ہیں۔