معاشی ترقی، بہتر گورننس :فیصل آباد کو بھی الگ صوبہ بنایا جائے، تاجر برادری کا بڑا مطالبہ

فیصل آباد:ملک میں نئے انتظامی یونٹس اور صوبوں کے قیام کی بحث کے دوران صنعتی حب فیصل آباد کی تاجر برادری نے بھی میدان میں آتے ہوئے مطالبہ کیا ہے کہ معاشی ترقی اور بہتر گورننس کے لیے فیصل آباد ڈویژن کو فوری طور پر الگ صوبائی حیثیت دی جائے۔
فیصل آباد میں تاجر رہنماؤں کے ایک بڑے اجتماع سے خطاب اور پریس کانفرنس کے دوران تاجر برادری نے اسلام آباد کو خودمختار انتظامی یونٹ یا صوبائی حیثیت دینے کے حالیہ حکومتی و سیاسی مباحث کا تو خیرمقدم کیا، لیکن ساتھ ہی دوٹوک مؤقف اپنایا کہ اسلام آباد میں کسی بھی نئے انتظامی نظام کے نفاذ سے قبل فیصل آباد ڈویژن کو صوبہ بنایا جائے۔
تاجر برادری کا کہنا تھا کہ ملک میں حکومتیں اور سیاسی چہرے تو بار بار بدلے گئے ہیں، لیکن اس کے باوجود عام عوام کے شہری، ضلعی اور بنیادی مسائل کا کوئی مؤثر حل سامنے نہیں آ سکا۔ انہوں نے افسوس کا اظہار کیا کہ پاکستان کے ساتھ آزاد ہونے والے دیگر ممالک ترقی کی دوڑ میں بہت آگے نکل گئے، جبکہ ہم محض انتظامی ناکامیوں کے باعث پستی کا شکار رہے۔ ان کا کہنا تھا کہ محض حکمرانوں کی تبدیلی سے مسائل حل نہیں ہوں گے بلکہ موجودہ فرسودہ انتظامی نظام میں بنیادی اصلاحات ناگزیر ہیں۔
تاجر رہنماؤں نے اس عزم کا اعادہ کیا کہ بہتر گورننس اور عوامی مسائل کے فوری حل کے لیے اختیارات کو نچلی سطح تک منتقل کرنا اور انتظامی یونٹس کو مؤثر بنانا وقت کی اہم ترین ضرورت ہے۔ ان کا مؤقف تھا کہ فیصل آباد کو صوبائی حیثیت ملنے سے نہ صرف اس خطے کے عوام کو بہتر نمائندگی حاصل ہوگی بلکہ صنعت و تجارت کے دیرینہ مسائل کا فوری تدارک بھی ممکن ہو سکے گا۔