واشنگٹن:نائن الیون (9/11) کے ہلاکت خیز حملوں کی پچیسویں برسی کے موقع پر امریکی انٹیلی جنس ایجنسی (CIA) نے تاریخ کا سب سے بڑا اقدام کرتے ہوئے اسامہ بن لادن اور القاعدہ کے خلاف جمع کی گئی دجنوں انتہائی خفیہ صدارتی بریفنگ دستاویزات کو ڈی کلاسفائی (عوامی سطح پر ظاہر) کر دیا ہے۔
ان دستاویزات میں انکشاف کیا گیا ہے کہ امریکی حکومت کو حملوں سے کئی سال قبل ہی اسامہ بن لادن کی خطرناک سازشوں اور طیارے ہائی جیک کرنے کے منصوبوں کی پیشگی اطلاعات مل چکی تھیں۔
سی آئی اے کے ڈائریکٹر جان ریٹکلف نے اسے "غیر معمولی شفافیت کا حامل اقدام” قرار دیتے ہوئے بتایا کہ یہ ایجنسی کی تاریخ میں صدارتی روزانہ کی بریفنگز (Presidential Daily Briefs) کا سب سے بڑا اجرا ہے۔ ان دستاویزات میں فروری 1998 کی وہ فائل بھی شامل ہے جس میں بن لادن کی جانب سے بڑے پیمانے پر تباہی پھیلانے والے ہتھیاروں (WMD) کے حصول کی کوششوں کا ذکر کیا گیا تھا، جبکہ 12 ستمبر 2001 کو تیار کی گئی رپورٹ میں انکشاف کیا گیا کہ یہ حملے دو سال سے پلان کیے جا رہے تھے اور ان کا ہدف امریکی کیپیٹل بھی تھا۔
دستاویزات کے مطابق، اپریل 1998 کی ایک رپورٹ میں طالبان کی جانب سے اسامہ بن لادن کو افغان سرزمین پر پناہ دینے اور سوویت قبضے کے دوران اس کی مدد کے صلے میں اس کے خلاف کارروائی سے ہچکچاہٹ کا ذکر کیا گیا۔ جولائی 1998 میں انٹیلی جنس بریفیرز نے خبردار کیا تھا کہ بن لادن کی اولین ترجیح امریکی سرزمین پر حملے کرنا ہے، اور دو ماہ بعد ستمبر 1998 میں یہ تحریر کیا گیا کہ القاعدہ دھماکہ خیز مواد سے بھرے ہوائی جہاز کو کسی امریکی شہر یا عمارت سے ٹکرا سکتی ہے۔
مزید برآں، دسمبر 1998 کی بریفنگز میں اس بات کا انکشاف بھی کیا گیا کہ سازش کاروں نے نیویارک کے ایک نامعلوم ہوائی اڈے پر آزمائشی طور پر سیکیورٹی چیکس کو چکمہ دینے کی کامیاب مشق کی تھی اور نیٹ ورک کے چند ارکان کو باقاعدہ ہائی جیکنگ کی تربیت بھی دی گئی تھی۔ اگست 2001 (یعنی حملوں سے محض ایک ماہ قبل) کی رپورٹس میں اس امر کی تصدیق کی گئی تھی کہ امریکہ کے اندر ہائی جیکنگ یا دیگر حملوں کی تیاریوں سے متعلق مشکوک سرگرمیاں جاری ہیں، جن میں نیویارک کی وفاقی عمارتوں کی نگرانی بھی شامل تھی، اور اس وقت ایف بی آئی اسامہ بن لادن سے جڑی تقریباً 70 فیلڈ انویسٹی گیشنز چلا رہی تھی۔
ان دستاویزات کا اجرا ایک ایسے وقت میں سامنے آیا ہے جب دنیا اس سیاہ دن کی چوتھی دہائی کا آغاز کر رہی ہے، جس نے امریکی قومی سلامتی کی بنیادوں کو ہلا کر رکھ دیا تھا۔
9/11 حملوں کے 25 سال مکمل: ”سی آئی اے نے 1998 میں بتا دیا تھا “ خفیہ دستاویزات جاری ،خوفناک انکشافات سامنے آ گئے
