سکھر ( رپورٹ/ عبد الرحمان راجپوت )
راجپوت برادری کے متعدد افراد نے بجلی کے بلوں، غیر قانونی کنکشنز، بجلی کی بحالی، غریب اور مستحق طلبہ کے تعلیمی وظائف سمیت پولیس سے متعلق مختلف مسائل سے صدر سہیل راجپوت کو آگاہ کیا۔ صدر سہیل راجپوت نے مسائل سننے کے بعد متعلقہ محکموں کے افسران سے ملاقاتیں اور رابطے کرکے متاثرہ افراد کی مشکلات کے ازالے کے لیے اپنا کردار ادا کیا۔
برادری کے مطابق سہیل راجپوت کی کاوشوں کے نتیجے میں بعض گھروں کی بجلی کی بحالی، مستحق طلبہ کے لیے تعلیمی وظائف کے انتظام اور پولیس سے متعلق زیرِ التواء معاملات میں پیش رفت کے لیے متعلقہ حکام سے رابطے کیے گئے، جس پر برادری کے افراد نے ان کی خدمات کو سراہا۔
اس موقع پر راجپوت برادری کے معززین اور مختلف افراد نے کہا کہ سہیل راجپوت نے برادری کے مسائل کو ذاتی ذمہ داری سمجھ کر حل کروانے کی کوشش کی ہے۔ ان کا کہنا تھا کہ مشکل وقت میں برادری کے افراد کے ساتھ کھڑا ہونا اور ان کے جائز مسائل متعلقہ اداروں تک پہنچانا قابلِ تحسین اقدام ہے۔ انہوں نے امید ظاہر کی کہ آئندہ بھی سہیل راجپوت اسی جذبے کے ساتھ برادری کی خدمت کا سلسلہ جاری رکھیں گے۔
صدر روشن مستقبل ویلفیئر ایسوسی ایشن سکھر سہیل راجپوت نے میڈیا سے گفتگو کرتے ہوئے کہا کہ "راجپوت برادری میرے لیے ایک خاندان کی حیثیت رکھتی ہے۔ برادری کے کسی بھی فرد کو جائز مسئلہ درپیش ہو تو اس کے حل کے لیے اپنی استطاعت کے مطابق آواز اٹھانا اور متعلقہ اداروں سے رابطہ کرنا میری ذمہ داری ہے۔”
برادری کی ترقی اور خوشحالی کے لیے اتحاد، بھائی چارے، تعلیم اور روزگار کو فروغ دینا وقت کی اہم ضرورت ہے۔ نوجوان نسل کو بہتر تعلیمی مواقع فراہم کرنا، مستحق طلبہ کی حوصلہ افزائی کرنا اور روزگار کے مواقع کے حصول میں ان کی رہنمائی کرنا ان کی ترجیحات میں شامل ہے۔
برادری کے تمام افراد کو باہمی اختلافات سے بالاتر ہوکر اتحاد و اتفاق کے ساتھ آگے بڑھنا ہوگا، کیونکہ اجتماعی اتحاد ہی سے معاشرے میں برادری کے مسائل مؤثر انداز میں اجاگر اور حل کروائے جاسکتے ہیں۔ وہ خدمتِ خلق اور برادری کی فلاح و بہبود کے لیے اپنی کوششیں جاری رکھیں گے۔
آخر میں برادری کے معززین نے سہیل راجپوت کی خدمات کو سراہتے ہوئے ان کے لیے نیک خواہشات کا اظہار کیا اور دعا کی کہ اللہ تعالیٰ انہیں عوام اور برادری کی خدمت کرنے کی مزید توفیق عطا فرمائے۔