مورو (رپورٹ محمد اسلم مغل)
مورو کے کچے کے علاقے گاؤں بنگل خان بڑڈی میں گھر میں زہریلا کھانا کھانے کے باعث ایک ہی خاندان کے 5 افراد بیہوش ہو گئے جن میں سے 3 جاں بحق ہو گئے۔
پولیس کے مطابق کسان سکندر علی بڑڈی نے ایک دن قبل گھر میں پراٹھا کھایا تھا۔ کھانے کے کچھ دیر بعد انہیں بخار، الٹیاں اور سر میں چکر آنے لگے اور وہ بیہوش ہو گئے۔
متاثرہ افراد میں سکندر علی بڑڈی، ان کی اہلیہ، 15 سالہ بیٹی فرزانہ بڑڈی، 12 سالہ بیٹی *عارفہ بڑڈی اور بیٹا راہیل شامل تھے۔
اہل خانہ نے فوری طور پر تمام 5 افراد کو شاہپور جہانیاں اسپتال منتقل کیا۔ حالت نازک ہونے کے باعث ڈاکٹروں نے انہیں *نواب شاہ اسپتال ریفر کر دیا۔
نواب شاہ اسپتال میں علاج کے دوران سکندر علی بڑڈی اور ان کی دونوں بیٹیاں فرزانہ اور عارفہ دم توڑ گئیں۔ قانونی کارروائی کے بعد لاشیں ورثاء کے حوالے کر دی گئیں۔
لاشیں جب ایک ساتھ گاؤں پہنچیں تو کہرام مچ گیا۔ پورے گاؤں میں سوگ کی فضا ہے۔ ہر طرف رو رو کر برا حال ہے۔