لاہور: وزیراعلیٰ پنجاب مریم نواز شریف سے اوکاڑہ سے تعلق رکھنے والے اراکینِ صوبائی اسمبلی نے ملاقات کی، جس میں صوبائی سیاسی صورتحال، حلقے کے ترقیاتی منصوبوں اور عوام کو درپیش مسائل پر تفصیلی تبادلہ خیال کیا گیا۔
ملاقات کرنے والے وفد میں صوبائی وزیر عاشق حسین شاہ, جاوید علاؤالدین ساجد, چوہدری افتخار حسین چھچھڑ, نور الامین وٹو, علی عباس, میاں یاور زمان, میاں محمد منیر اور غلام رضا شامل تھے۔ ارکانِ اسمبلی نے وزیراعلیٰ کو اپنے حلقوں کے مسائل سے آگاہ کیا جس پر مریم نواز شریف نے مسائل کے فوری حل کی بھرپور یقین دہانی کرائی۔
ارکانِ اسمبلی نے پنجاب کے 41 اضلاع اور دو تحصیلوں میں مربوط سیف سٹی نیٹ ورک کے قیام، اوکاڑہ جی ٹی روڈ سے بائی پاس کی تعمیر و بحالی اور اوکاڑہ کے شہریوں کے لیے الیکٹروبس کے اجراء پر وزیراعلیٰ کو زبردست خراج تحسین پیش کیا۔ انہوں نے بتایا کہ الیکٹروبسیں جنرل بس اسٹینڈ سے اختر آباد، کرمانوالہ، اڈہ کسان اور اوکاڑہ یونیورسٹی تک کامیابی سے رواں دواں ہیں، جبکہ طلبہ، خواتین اور بزرگوں کے لیے ان بسوں میں مفت سفر کی سہولت انتہائی قابلِ تحسین اقدام ہے۔ ارکان نے اس بات پر بھی اتفاق کیا کہ سیف سٹی اور پولیس کے مؤثر اقدامات کی بدولت پنجاب میں جرائم کی شرح میں نمایاں کمی آ رہی ہے۔
ارکان سے گفتگو کرتے ہوئے وزیراعلیٰ مریم نواز شریف نے کہا کہ پنجاب میں عوامی پراجیکٹس کی بروقت تکمیل کے لیے کم وقت میں زیادہ سے زیادہ کام کرنا چاہتے ہیں۔ انہوں نے کہا کہ تاریخ میں پہلی بار صوبے کے تمام شہروں اور دیہات کو یکساں طور پر ’ستھرا پنجاب‘ پروگرام کے ذریعے صاف کیا جا رہا ہے۔ انہوں نے مزید کہا کہ "پہلی بار لاہور اور پسماندہ شہروں کا فرق ختم کیا گیا ہے، اور اب ہم ہر شہر اور ہر گاؤں میں الیکٹروبسیں چلا رہے ہیں۔” وزیراعلیٰ نے اس عزم کا اعادہ کیا کہ پنجاب کے عوام کے معیارِ زندگی میں بہتری اور ’اپنی چھت، اپنا گھر‘ اور ’کسان کارڈ‘ جیسے مقبول عوامی پراجیکٹس کی کامیابی سے ان کے دل کو انتہائی سکون ملتا ہے۔ ملاقات کے دوران انہوں نے ارکانِ اسمبلی کو عوام کے ساتھ قریبی رابطے رکھنے کی بھی ہدایت کی۔