کپاس کے کاشتکاروں کیلئے بڑی خوشخبری: آسٹریلوی ماہرین کے تعاون سے ’’حمیر فقیر جنت سیڈ‘‘ کی تیاری کا اعلان

سانگھڑ (رپورٹ: اشفاق سلہری): حمیر فقیر گروپ انڈسٹری کے چیئرمین سیٹھ پریم چند نے زرعی شعبے میں ایک اہم اور شاندار پیش رفت کا اعلان کرتے ہوئے کہا ہے کہ مقامی سطح پر معیاری اور اعلیٰ قسم کے کپاس کے بیج کی فراہمی کے لیے جلد آسٹریلوی ماہرین کے فنی تعاون سے ’’حمیر فقیر جنت سیڈ‘‘ کی تیاری کا آغاز کیا جا رہا ہے۔
اس حوالے سے بات چیت کرتے ہوئے سیٹھ پریم چند کا کہنا تھا کہ ملک میں معیاری اور تصدیق شدہ بیج کی عدم دستیابی ہمیشہ سے کپاس کے کاشتکاروں کے لیے ایک بڑا اور دیرینہ مسئلہ رہی ہے۔ اس نئے منصوبے کا بنیادی اور واحد مقصد مقامی کسانوں کو بہترین معیار کا بیج فراہم کرنا ہے تاکہ وہ اپنی فصل کی فی ایکڑ پیداوار میں خاطر خواہ اضافہ کر سکیں۔
انہوں نے مزید وضاحت کرتے ہوئے کہا کہ آسٹریلیا کے زرعی ماہرین کی تکنیکی معاونت سے تیار کیا جانے والا یہ نیا بیج جدید زرعی تقاضوں اور موسمیاتی تبدیلیوں کے عین مطابق ہوگا۔ اس منصوبے سے نہ صرف سانگھڑ بلکہ پورے علاقے کے کپاس کے کاشتکاروں کو براہِ راست مالی فائدہ پہنچے گا، بلکہ مجموعی طور پر ملکی سطح پر کپاس کی پیداوار میں بھی نمایاں بہتری آئے گی۔
چیئرمین حمیر فقیر گروپ نے اس عزم کا اعادہ کیا کہ ’’حمیر فقیر جنت سیڈ‘‘ کی تیاری کا یہ اقدام زراعت کے شعبے بالخصوص کپاس کی کاشت کے لیے ایک سنگِ میل ثابت ہوگا، جس کا مقصد کسانوں کی محنت کا صلہ دلانا اور ان کی معاشی خوشحالی میں بھرپور کردار ادا کرنا ہے۔