خوشاب/سرگودھا (راجہ نورالہی عاطف سے)
سرگودھا ڈویژن سکواش ایسوسی ایشن کے زیراہتمام آزادی کپ سکواش ٹورنامنٹ میں شاہزیب نے شاندار کھیل کا مظاہرہ کرتے ہوئے چیمپئن شپ اپنے نام کرلی، انس آصف رنر اپ جبکہ عثمان نے تیسری پوزیشن حاصل کی۔ گرلز ایونٹ میں انیبا نے فاتح کا اعزاز حاصل کیا، کنز الایمان دوسرے اور عائشہ زینب تیسرے نمبر پر رہیں۔ ٹورنامنٹ میں 27 کھیلاڑیوں نے حصہ لیا، گرلز مقابلے سکواش کمپلیکس جبکہ بوائز کے میچز اور فائنل جمخانہ کلب میں کھیلے گئے۔آزادی کپ سکواش ٹورنامنٹ کی پروقار تقسیمِ انعامات تقریب میں مہمان خصوصی محمد عاطف سندھو، ایڈیشنل ڈپٹی کمشنر میونسپل سروسز/منیجنگ ڈائریکٹر ستھرا پنجاب نے کامیاب کھیلاڑیوں میں شیلڈز تقسیم کیں۔ صدر سرگودھا ڈویژن سکواش ایسوسی ایشن چوہدری وارث ندیم وڑائچ، ڈائریکٹر ایڈمن طارق اعوان اور شہاب خان نے مہمان خصوصی کا استقبال کیا۔ سینئر نائب صدر وسیم جعفر نقوی، ڈاکٹر عتیقہ ریحان، راجہ اسد، یاسر وڑائچ، عامر چوہدری، فخر میکن اور جنید خان سمیت دیگر شخصیات بھی تقریب میں موجود تھیں۔ ٹورنامنٹ میں کھیلاڑیوں نے بھرپور جوش، جذبے اور بہترین کھیل کا مظاہرہ کیا۔ تقریب کے اختتام پر مہمان خصوصی اور ایسوسی ایشن عہدیداران نے کھیلاڑیوں کی حوصلہ افزائی کرتے ہوئے مستقبل میں بھی سکواش کے فروغ کے لیے ایسی سرگرمیوں کے تسلسل پر زور دیا۔